بەپێی هەواڵی کوردپرێس، ئاژانسى فەرمى عێراق بڵاوی کردەوە جاسم فەلاحی، وەزیری ژینگەی عێراق ڕایگەیاندووە، زۆربەی زریانە خۆڵاوییەکان لە سێ وڵاتی دراوسێوە هاتوونەتە عێراق و چەند جموجوڵێکی دیپلۆماسی هەیە بۆ ئەنجامدانی دیالۆگێکی هەرێمی بۆ کەمکردنەوەی زریانە خۆڵاوییەکان و وشکەساڵی.

ئاماژەی بەوەش کرد، "دیالۆگی هەرێمی نێوان وڵاتانی ناوچەکە سەبارەت بە زریانی خۆڵاوی زۆر گرنگە، دەبێت رێوشوێنی خێرا بگیرێتەبەر بۆ کەمکردنەوەیان".

فەلاحى وتیشى: "دەستپێشخەریی ناوخۆیی و ناوچەیی هەیە بۆ ڕووبەڕووبوونەوەی گۆڕانی کەشوهەوا"، ڕوونیشیکردەوە کە "دیپلۆماسی عێراق کار لەسەر ئەنجامدانی کۆبوونەوە و دیالۆگ دەکات کە ڕووبەڕووی ئاڵنگارییەکانی زریانی خۆڵاوی و کەمیی ئاو و بە بیابانبوون ببێتەوە".

وەزیری ژینگە ئاماژەی بەوەدا کە "عێراق دەکەوێتە توندی وشکەساڵی و بە بیابانبوون، نەبوونی باران لە سێ ساڵی ڕابردوودا بووەتە هۆی زیانگەیاندن بە خاک".