ڕزوان سیدۆ ئەندامێکی مەکتەبی ڕێکخستنی ئەنجومەنی نیشتمانیی کورد (ENKS)لە گفتوگۆ لەگەڵ کوردپرێسدا ئاماژەی دا بە دوورنواڕی مژاری گفتوگۆکان لەنێوان ئیدارەی خۆسەر و حکوومەتی ناوەندیی سووریا و ڕۆڵی حزبە کوردییەکان لە ئایەندەی سیاسیی سووریا و ڕایگەیاند: ماوەیەکی زۆرە کە باس لە گفتوگۆی نێوان حزبەکانی یەکێتیی دیموکراتیک (PYD) و ئیدارەی خۆسەر لەگەڵ حکوومەتی ناوەندیی سووریا دەکرێت. ئیدارەی خۆسەر دەڵێت کە دیمەش بوونی ئەم ئیدارەیە قبووڵ بکات و دانی پێدا بنێت و هێزەکانی ئەم ئیدارەیە ببنە بەشێک لە هێزە سەربازییەکانی داهاتووی سووریا.

ناوبراو درێژەی دا: پەیەدە هەر مامەڵەیەک کە ویستوویە لەگەڵ حکوومەت ئەنجامی بدات تا کوو ئەمڕۆ قبووڵ نەکراوە و ئێمەیش ئاگارداری مامەڵەی نێوانیان نین و هیچ پرسێک لەم نێوانەدا بۆ ئێمە و خەڵکی کوردی سووریا ڕوون نەکراوەتەوە.

ناوبراو جەختی کردەوە: ڕوون نییە کە ئیدارەی خۆسەر بەدوای مافی سیاسی یا مافی نەتەوەیی و شتێکی تردایە و ڕوونکردنەوە لەمبارەوە نادات.

ناوبراو زیادی کرد: ئەم ئیدارەیە دەڵێت حکوومەت ئاوڕ لە داواکارییەکانی ئێمە ناداتەوە و قبووڵیان ناکات بەڵام ئێمە نازانین پەیەدە داوای چیی لە حکوومەت کردووە و هێشتا هیچ شتێک لەمبارەوە شەفاف نییە.

ئەندامی مەکتەبی ڕێکخستنی ئەنجومەنی نیشتمانیی کورد (ENKS)وەبیری هێنایەوە: حزبەکانی یەکێتیی نیشتمانیی کورد (PYNK)یش بەشێکن لە هاوپەیمانیی لەگەڵ پەیەدە و هەر پرسێک دێتە ئاراوە ئەوانیش هاوبەشن.

ڕزوان سیدۆ لەبارەی ڕۆڵی ئەنجومەنی نیشتمانیی کورد (ENKS) لە مامەڵەکانی کوردستانی سووریا وتی: ئەنەکەسە بەشێکە لە ئۆپۆزیسیۆنی سووریا و لە دانوستانی ژێنێڤ و لیژنەی ڕەشنووسی دەستووری نوێی سووریا ئامادەیە. ئەنجومەنی نیشتمانیی کورد جەخت لە مافی نیشتمانیی کوردەکان دەکاتەوە لە یاسای بنەڕەتیی نوێی سووریا.

ناوبراو لەبارەی ڕۆڵی ڕووسیا لە هاوکێشەکانی باکووری سووریا زیاتر وتی: ڕووسیا لە ڕێگای کارتی تورکیاوە دەیهەوێت گوشار بخاتە سەر ئیدارەی خۆسەر تاکوو ئەم ئیدارەیە خۆی تەسلیمی حکوومەتی ناوەندیی بکات.

ئەندامەکەی مەکتەبی ڕێکخستنی ئەنجومەنی نیشتمانیی کورد (ENKS)ڕاشیگەیاند: بۆ ئێمە و خەڵکی کوردی سووریا ئەم بابەتە گرینگە کە هەر لایەنێک کە لەگەڵ حکوومەت و ئۆپۆزیسیۆن دانوستان دەکات مافی نیشتمانیی کورد لەبەرچاو بگرێت و بیخاتە ناو دەستووری سووریا.