سووریا سەقامگیر نابێت بە بێ بەشداریی کور لە بڕیارەکاندا
پوختەی هەواڵ
بەپێی هەواڵی کوردپرێس، بافڵ تاڵەبانی، سەرۆكی یەكێتیی نیشتمانیی كوردستان لە پەراوێزی بەشداریكردنی لە كۆنفرانسی ئاسایشی میونشن لە ئەڵمانیا لەگەڵ تۆبیاس لیندنەر، وەزیری دەوڵەتی ئەڵمانیا بۆ كاروباری دەرەوە كۆبووەوە .
بەگوێرەی ڕاگەیەنراوی نووسینگەی سەرۆكی یەكێتی، لە كۆبوونەوەكەدا جەخت لە پێویستی هەماهەنگی و كاری هاوبەش و پەرەپێدانی پەیوەندییەكانی هەردوولا كرایەوە لەپێناو كاراتركردنی هەوڵەكان بۆ پاراستنی ئاسایش و ئارامی لە ناوچەكەدا.
دۆخی سووریا و كوردستان لە كۆبوونەوەكەدا بە وردی هەڵسەنگاندنی بۆ كرا و بافڵ تاڵەبانی پەرۆشی یەكێتیی بۆ چارەسەری ئاشتیانەی پرسی كورد لە سووریا تەئكید كردەوە.
ناوبراو وتیشی: "پاراستنی مافی هەموو نەتەوە و پێكهاتەكان بە تایبەت كورد و بەشداربوونیان لە بڕیار و بنیادناوەی سووریای نوێ زامنی سەقامگیری دەبێت و هەر هەوڵێكیش لەدەرەوەی ئەم ئامانجە دۆخەكە ئاڵۆزتر دەكات، بۆیە ئەركی هەموولایەكە پشتگیری پاراستنی ناوچەكە و سەرخستنی هەوڵەكان بێت بۆ گەیشتن بە چارەسەری نیشتمانیی لەوبارەیەوە”.
بۆچوونی بەکارهێنەران