بەپێی هەواڵی کوردپرێس، بەگوێرەی ئەو دۆسیەیەى لەسەر دەمیرتاش کراوەتەوە، لە چەند گوتەیەکدا کە لە شارەکانی ئەنقەرە، دیاربەکر، مێردین و مێرسین پێشکەشی کردوون، سووکایەتیی بە ئەردۆغان کردووە.

ئۆزگور ئۆزبەک، پارێزەری دەمیرتاش ئاماژەی بەوەکرد، پێویستە گوتەکانی سەلاحەدین دەمیرتاش لە چوارچێوەی ئازادیی ڕادەربڕیندا لێکبدرێتەوە و ئەو دۆخە لەبەرچاو بگیرێت کە ناوبراو قسەکانی تێدا کردووە کە پەرلەمانتار بووە و پارێزبەندیی هەبووە.

ناوبراو جەختی لەوەش کردەوە، هەر لەبەر ئەوەیە ئەم دادگایی کردنە دژی یاسایە، بەڵام دەستەی دادگا داواکارییەکەی ئۆزبەکی ڕەت کردەوە.

دواتر دەستەی دادگا بڕیارەکەی خوێندەوە و ئاماژەی بەوەکرد، بەگوێرەی ماددەی ۳۰۱ لە یاسای سزادانی تورکی و بە تاوانی "سووکایەتی کردنی ئاشکرا بە گەلی تورک، دەوڵەتی کۆماری تورکیا، حکوومەتەکەی و دەسەڵاتی دادوەریی "بە ساڵێک و سێ مانگ و بە تاوانی "هاندانی خەڵک بۆ ڕق و کینە و دوژمنایەتی" بە ساڵێک و سێ مانگی دیکە، واتە کۆی گشتی بە دوو ساڵ و شەش مانگ سزادرا.

دوو مانگ لەمەوبەر و لە ناوەڕاستی مانگی ئایاردا، دەمیرتاش کە ماوەی هەشت ساڵە دەستبەسەرە، لە دۆسییەی کۆبانیدا ۴۲ ساڵ زیندانیی بەسەردا سەپێنرا.