بەپێی هەواڵی کوردپرێس، ناسر کەنعانی لە کۆنفڕانسى ڕۆژنامەوانی هەفتانەی خۆیدا سەبارەت بەوردەکاری ڕێکەوتنەکەیان لەگەڵ لایەنی عێراقی بۆ چەکداماڵینی گرووپە دژبەرەکانی ئێران، وتی: "ئێمە لەگەڵ حکوومەتی عێراقدا ڕێکەوتنێکمان کردووە کە بەگوێره‌ى ئەو ڕێکەوتنە عێراق خۆی پابەندکردووە کە تا کۆتایی مانگی ۹ چه‌ک له‌و حزبانه‌ دابماڵێت ئه‌مه‌ش بۆ ئه‌وه‌ى چیتر نەبنە هەڕەشە بۆ سەر ئاسایشی وڵاتی ئێران".

وتەبێژی وەزارەتی دەرەوەی ئێران سەبارەت بەناوەڕۆکی خاڵەکانی ڕێکەوتنەکەیان لەگەڵ عێراقدا، ئاشکرای کرد: "بەگوێره‌ى ڕێکەوتنەکەی نێوانمان، ئەو بنکە و بارەگایانەی ئه‌و حزبانه‌ دروستیان کردوە دەبێت چۆڵ بکرێن ‌و ئەوان بۆ کەمپی دیاری‌کراو کە عێراق بۆ ئەوانی داناوە و دیاری دەکات ڕەوانە بکرێن، ناوەڕۆک ‌و دەقی ئەو ڕێکەوتنەش بە بەرپرسانی هەرێمى کوردستان دراوە و پێیان ڕاگەیەندراوە کە پێوەی پابەند بن ‌و نابێت چیتر ئەو واده‌یه‌ى دیاری‌کراوه‌ درێژ بکرێته‌وه‌".

وتەبێژی وەزارەتی دەرەوەی ئێران ئه‌وه‌شى وت: "لەئێستادا پەیوەندی ئێمە لەگەڵ هەرێمی کوردستان پەیوەندییەکی ئەرێنی ‌و باشە و بەردەوامیی هەیە و هیوادارین ئەم خاڵە ڕەشەش لەسەریان نه‌مێنێت، له‌پێناو درێژه‌دان بەپەیوەندیەکانى نێوانمان".

کەنعانی ڕاشیگەیاند: سەردانەکەی وەزیری دەرەوەی ئێران بۆ عێراق لە چوارچێوەی پەیوەندییەکانمان لەگەڵ ئەو وڵاتە ڕەنگە لە ماوەیەکی گونجاودا ئەنجام بدرێت، بەڵام ئەگەری ئەوەش هەیە ئەم سەردانە هەرێمی کوردستانیش بگرێتەوە.