بەپێی هەواڵی کوردپرێس، سروه‌ عه‌بدولواحید سه‌رۆکى فراکسیۆنى نه‌وه‌ى نوێ له ‌فه‌یسبووکى خۆى باسى له‌ خۆپیشاندانه‌کانى که‌رکووک دژى گه‌ڕانه‌وه‌ى پارتى کردووه‌ و دەڵێت: "ئەو بەناو کێشە دروستکراوانەی لە کەرکووک ڕوودەدات بە ڕووکەش لەنێوان پارتی ‌و هاوپەیمانەکانی لە حکوومەتی عێراق، هیچ نییە جگە لە سیناریۆیەکی دروستکراو کە پێشتر هەردوولا لەسەری ڕێککەوتوون".

سه‌رۆکى فراکسیۆنى نه‌وه‌ى نوێ نووسیویه‌تى: "هەردوو لایەنەکە لە بەغدا لە سەریەک سینی نان دەخۆن‌ و لەناو یەک هاوپەیمانیدا بەشدارن لە حکوومەت، بەڵام بەهۆی شکستیان لە پێشکەش کردنی خزمەت بۆ هاوڵاتییان دێن ئەم سیناریۆ چەندبارانە دەورووژێننەوە، هەمووجار پێش هەڵبژاردنەکان دەیانەوێت بەمە سۆزی خەڵک بجووڵێنن‌ و دەنگ کۆ بکەنەوە، لەبری بەخزمەت‌کردنی هاوڵاتییانی کەرکووک هەوڵ‌ بده‌ن دەنگ کۆ بکەنەوە".

له ‌کۆتاییدا جه‌ختی کردۆته‌وه‌: "بۆیە دڵنیابن خەڵک بەم درۆ چەندبارانەتان باوەڕ ناکات، ئێوەبوون وەک هەردوو حزبی دەسەڵاتدار کەرکووکتان فرۆشت ‌و ئێستاش لە بەغدا شەریکی عەرەب‌ و تورکمانی سوننە و شیعەن، هیچ کێشەتان نییە لە بەغدا".