بەپێی هەواڵی کوردپرێس، مەسعوود بارزانی سه‌رۆکى پارتى دیموکراتى کوردستان لەکتێبە تازەکەیدا (بارزانی‌ و بزووتنەوەی ڕزگاریخوازی کورد) نووسیوویه‌تى، لەسەروبەندی هێرشی داعش بۆسەر هەولێر، حاجی قاسم سلێمانی بەتەلەفۆن پەیوەندیی پێوەکردم ‌و پرسیاری بارودۆخ ‌و پێویستییەکانی کرد.

بارزانی ده‌ڵێت: "منیش لەوەڵامدا پێم‌ڕاگەیاند، بارودۆخەکە مەترسیدارە، چوونکە پێشمەرگە چەک‌ و تەقەمەنی ‌و کەلوپەلی پێویستی لەبەردەستدا نییە بۆ ڕێگرتن لە هەمەر و ئۆتۆمبێلە گولەنەبڕەکانی داعش، ئەگەر بکرێت گولەی ئاڕبیجی دژەتانک ‌و گولەی دۆشکای تانکشکێنمان بۆ بنێرن".

سەرۆکی پارتی دیموکراتی کوردستان ئه‌وه‌شى وتووه‌: "دوای ئەوە قاسم سلێمانی مەردانە بۆ بەیانییەکەی فڕۆکەیەک فیشەک‌ و دۆشکا و گولەی ئاڕبیجیی گەیاندە هەولێر، ئەمە لەبەرەبەیانیی ڕۆژی ۸ی ئابی ۲۰۱۴دا بوو، ئەم هاوکارییە بوو بەهۆی ڕاگرتنی هێرش ‌و پێشڕەوییەکانی داعش لەمیحوەری گوێڕ کە هەڕەشەیەکی جددی بوو، دواتر قاسم سلێمانی خۆی سەردانی کرد و دوو مەفرەزەی هاوەنهاوێژ و کاتیۆشایەکی ۱۰۷ی بۆ پاڵپشتیی پێشمەرگە هێنابوو، دوو کەسی هاوەنهاوێژەکانیان لەگەڵ پێشمەرگە لەبەرەی مەخمور شەهید بوون".

بارزانی ئه‌وه‌شى نووسیوه‌:، "لێرەوە ئەمە بەتەواوی ڕوون‌ده‌که‌ینه‌وه‌ بەڕاستی یارمەتییەکانی ئێران لەوکات ‌و ساتەدا هاوکارییەکی کاریگەربوو، جێی خۆی گرت".