بەپێی هەواڵی کوردپرێس، حسێن ئەمیر عەبدوڵڵاهیان وەزیری دەروەی ئێران لە کۆبوونەوە لەگەڵ عوسمان غانمی وەزیری ناوخۆی عێراقدا خۆشحاڵی خۆی لە بەرەوپێش چوونی پێوەندییەکانی نێوان دوو وڵات دەربڕی و هیوای خواست بە بەشداریی هەموو ڕەوت و گرووپە سیاسییەکانی عێراق حکوومەتی نوێ پێک بهێنرێت.

وەزیری دەروەی ئێران لەبارەی ڕووبەڕووبوونەوەی هاوبەشی تیرۆر و ڕاگرتنی دیاردەی خۆڵبارین و هەڵگرتنی ڕێکارەکانی هاتوچۆ بەتایبەت لە ڕێوڕەسمی ئەربەعیندا لەگەڵ لایەنی عێراقی گفتوگۆی کرد.

ئەمیر عەبدوڵڵاهیان ئاماژەی دا بە پێوەندییە مێژووییەکانی نێوان دوو وڵاتی ئێران و عێراق و ڕایگەیاند شەهید بوونی هاوکاتی سەردار سولەیمانی و ئەبوو مەهدی موهەندیس ئەو پەڕی پێوەندییە ستراتێژیکەکانی نێوانمان دەردەخات.

لای خۆیەوە عوسمان غانمی وەزیری ناوخۆی عێراق جەختی کردەوە کە وڵاتەکەی نابێتە شوێنێک بۆ پەلاماردان و هێرش کردنە سەر وڵاتانی دراوسێ.