بەپێی هەواڵی کوردپرێس، میدیای فەرمیی یەکێتی لەبارەی پەیوەندییە تەلەفۆنییەکەوە دەڵێت، رێبەری رەوتی سەدر پەیوەندیی بە بافڵ تاڵەبانییەوە کردووە و "چەند پرسێکی گرنگی سیاسی پەیوەست بە دۆخی عێراق، پێکھێنانی حکوومەتی نوێ، زاڵبوون بەسەر کێشە و گرفتەكان و میکانیزمەكانی دەربازبوون لە دۆخی چەقبەستووی سیاسیی عێراق" گفتوگۆیان لەبارەوەکراوە.

هەردوولا هاوڕابوون لەسەر "بەردەوامیی گفتوگۆكان بۆ كۆتاییهێنان بەو دۆخەی عێراقی پێدا تێدەپەڕێت."

پەیوەندییە تەلەفۆنییەکە لەکاتێکدایە، 26ی ئاداری 2022، کۆبوونەوەی پەرلەمانی عێراق بۆ هەڵبژاردنی پۆستی سەرۆککۆمار نەکرا، بەهۆی ئامادەبوونی تەنیا 202 پەرلەمانتار لە کۆبوونەوەی پەرلەمان و تەواونەکردنی رێژەی یاسایی کە ئامادەبوونی 220 پەرلەمانتارە، دانیشتنەکە بۆ رۆژی چوارشەممە 30ی ئاداری 2022 دواخرا.

هاوپەیمانیی سێ قۆڵیی سەدر، پارتی و سوننە هەوڵدەدات رۆژی چوارشەممە 220 پەرلەمانتار ئامادەی دانیشتنی هەڵبژاردنی سەرۆککۆمار بن.