هەدەپە لەسەر هەڕەشەی وەزیری ناوخۆی تورکیا لە پەڕلەمانتارێکی ئەو پارتە هاتە دەنگ
پوختەی هەواڵ
کوردپرێس:
مەدحەد سنجار هاوسەرۆکی پارتی دیموکراتی گەلان (هەدەپە) لەلێدوانێکی رۆژنامەوانی و سەبارەت رووداوی هەڕەشەکردنی وەزیری ناوخۆی تورکیا لە ژنە پەڕلەمانتارەکەی هەدەپە وتی" سۆیڵوو هەرگیز شەرم نایگرێت لەوەی هەڕەشە لە گەل و ئۆپۆزیسیۆن بکات، لەبەرئەوەی ئەو ئازایەتییەکەی لە دەسەڵات و سیستەمەوە وەرگرتووە"
سنجار ئاماژەى بەوەش کردوە، تورکیا ئاشتیی و ئارامیی و ئاسایش بەخۆوە نابینێت مادام لەرووی جێبەجێکردنی یاساوە لەدواوەی وڵاتانی جیهاندابێت، لەجێگایەک کۆنترۆڵ و سەروەری یاسا بوونی نەبێت، گەندەڵیی و تاوانی ڕێکخراو بڵاودەبێتەوە، هەربۆیە دەبینین تورکیا لەئێستادا بۆتە ئیمپراتۆرییەتێکی تاوانکاریی.
باسی لەوەش کردووە کە لەکاتێکدا هەزاران بەڵگە لەسەر پەیوەندیی وەزیرەکانی تورکیا بە باندە مافیاییەکانەوە لەبەردەستە، کەچی نە حکومەت و پەڕلەمان هیج دەڵێن و نە داواکاری گشتیشت بە رۆڵی خۆی هەڵدەستێت.
سنجار وەک ئاماژەیێک بە دوژمنکاریی دەوڵەت بەرانبەر بە گەلی کورد لە تورکیا دەڵێت" ئەو سیستەمەی تورکیا بەردەوام دوژمنی ناوخۆیی درووستدەکات و جەنگ دژ بە گەلەکەی هەڵدەگیرسێنێت، هەر ئەم تێگەیشتنەش وڵاتەکەی رووخاندووە و وایکردووە هاوڵاتیانی ببنە دوژمنی یەکتر و وڵاتەکەش دابەش دابەش ببێت، ئەو تێگەیشتنە هەموو دەرگاکان بەرانبەر بە تاوانی ڕێکخراو و بڵاوکردنەوەی ماددە هۆشبەرەکان دەکاتەوە".
بۆچوونی بەکارهێنەران