بەپێی هەواڵی کوردپرێس، بەگوێرەی خشتەی دانیشتنەکانی دادگای باڵای فیدراڵی، دادگاکە بۆ تاوتوێ کردنی سکاڵای ۹ مامۆستا و فەرمانبەری هەرێمی کوردستان، کە لەدژی ڕاگرتنی پلەبەرزکردنەوەی فەرمانبەرانی هەرێمی کوردستان تۆمارکرابوو، کۆبووەوە. بەڵام دۆسیەکەی بۆ ۲۴-۱۲-۲۰۲۳ دواخست.

ئاوات ئازاد، یەکێک لەو کەسانەی سکاڵاکەی تۆمارکردووە رایگەیاند، "ئەمڕۆ پارێزەران و سکاڵاکاران لەدادگاکە ئامادەبون و بەرگریان لەدۆسیەکە کرد، لەبەرامبەردا پارێزەرانی حکومەتی هەرێمی کوردستانیش ئامادەبون، دادگا لەکۆتاییدا بڕیاریدا دانیشتنەکە بۆ مانگی داهاتو دوابخات بۆ ئەوەی دەرفەتی زیاتر بدات بەپارێزەران."

فەرمانبەران لەسکاڵاکەدا داوا دەکەن، حکومەتی ھەرێم ناچار بکرێت بەجێبەجێکردنی یاسای ھەموارکراوی موچەی فەرمانبەرانی فیدراڵی‌و کەرتی گشتی ژمارە ۲۲ی ساڵی ۲۰۰۸، ھەروەھا دەستپێکردنەوەی پلە بەرزرکردنەوەی فەرمانبەرانی ھەرێمی کوردستان.