بەپێی هەواڵی کوردپرێس، ئەمڕۆ چوارشەممە، مەسروور بارزانی سەرۆک وەزیرانی هەرێمی کوردستان لە کاتی کردنەوەی قوتابخانەی ماجیدی لە هەولێر باسی لە کێشەی مووچە و گرفتی دەستپێنەکردنەوەی دەوامی ژمارەیەک لە قوتابخانەکان کرد و ڕایگەیاند: "پاڵپشتی ئەو مامۆستایانە دەکەم کە داوای مافەکانیان دەکەن و دەنگم دەخەمە پاڵ دەنگیان، بەڵام دەبێت ڕووی ڕەخنەکانمان لەو لایە بێت کە هۆکارە بۆ بڕینی مووچە و دواکەوتنی مووچەکان، حکوومەتی هەرێم هۆکار نییە".

بارزانی وتیشی: "حکوومەتی هەرێم زۆر بە پەرۆشە بۆ ئەوەی بە زووترین کات مووچەکانیان بۆ دابین بکات، بەردەوامیش دەبێت بۆ ئەوەی پێکەوە داوای ئەو مافەی مامۆستایان و هەموو فەرمانبەرانی هەرێمی کوردستان بکەین".

مەسرور بارزانی ڕاشیگەیاند، بەداخەوە لەوانەیە هەندێک لایەن سواری شەپۆلی ناڕەزاییەکە بووبن و یاری بە هەستی مامۆستایان بکەن و هانیان بدەن بۆ ئەوەی بایکۆت بکەن و بەوەش تۆڵەی ئەوانەی مووچەکانیان بڕیون لە قوتابییەکان بکەنەوە.

ناوبراو ڕوونیشی‌کردەوە، پێویستە خۆڕاگریی و کۆڵنەدان یەکەم وانە بێت قوتابی لە مامۆستاوە فێربێت.

داواشی لە لایەنە سیاسییەکان کرد لەگەڵ حکوومەت داوای مافی مامۆستایان و خەڵکی هەرێمی کوردستان بکەن لەو شوێنانەی مافەکانیان پێشێل کردووەن. وەک ئاماژەیەک بۆ بەغدا.

مەسروور بارزانی وتیشی: "دڵنیاتان دەکەینەوە کە بە هیچ شێوەیەک ڕێگە نادەین هیچ مافێکی هیچ ماۆستایەک بفەوتێ و هەموویان قەرەبوو دەکرێنەوە و هیوادارم مامۆستا بەڕێزەکان بگەڕێنەوە بۆ قوتابخانەکان".