بەپێی هەواڵی کوردپرێس، لەتیف جەمال رەشید سەرۆک‌کۆماری عێراق لە بەیاننامەیەکدا بەتوندی ئیدانەی سووتاندنی قورئانی پیرۆز لەلایەن هاووڵاتییەکەوە لە وڵاتی سوید دەکات و رایدەگەیەنێت: "ئەم هێرش و پێشێلکارییانە هیچ پەیوەندییەکیان بە ئازادی ڕادەربڕین و بیروباوەڕەوە نییە، بەڵکوو لێدانە لە ئازادی، ئەمانە تاوانن دژی هەموو مرۆڤایەتی، وەک پێشێل‌کردنی بیر و باوەڕی موسڵمانان کە ڕێز لە پەرتووکە پیرۆزەکانی هەموو ئایینەکان دەگرن و ڕێز لە مافی ئازادی بیر و باوەڕی خەڵکی دەگرن".

سەرۆک‌کۆماری عێراق دەشڵێت: "دەستدرێژی‌کردنە سەر قورئانی پیرۆز، تاوانێکە کە ئازادی بیرکردنەوە و باوەڕی تێدا پێشێل دەکرێت، ئەم دەستدرێژییە بۆ سەر ئازادی لەو وڵاتانە دەیانخاتە دۆخێکی نەخوازراو کە ئەو دەستدرێژی‌کردنانەیان تێیدا رووداوە،  کە بەتەواوەتی دژی پابەندبوونیانە بە ئازادی بیرکردنەوە و بیروباوەڕو و پێشێلکردنی یاسا و رێساکانە کە ئازادی بیروڕا و ڕێزگرتن لە مافەکانی مرۆڤ مسۆگەر دەکەن. نابێت ئازادی تاکەکەس بەکاربهێنرێت بۆ بەشداریکردن لە ڕەفتارێکی ناشیاو کە بیروباوەڕی کەسانی دیکە بە بیانووی ئازادی بیروڕا و ڕادەربڕین پێشێل بکات".

سەرۆک‌کۆماری عێراق راشیدەگەیەنێت: "چاوەڕوانی لە ڕۆشنبیر و ئازادیخوازانی جیهانی ئازاد دەکەین کە بە هەڵوێستەکانیان بۆ پارێزگاری کردن لە ئازادی بیرکردنەوە و بیروباوەڕ  و ڕێز لە مافی زیاد لە دوو ملیار موسڵمان و جیاوازی و هەمەجۆری کۆمەڵگەی نێودەوڵەتی بەرز ڕابگرن، هەروەها چاوەڕوانی هەڵوێستی جدی و بەرپرسیارانە دەکەین، کەپەرۆشی  ڕێزگرتن بن لە بیروڕا و دینداری و پاراستنی مافی پێکەوەژیانی ئازاد و برایەتی لەنێوان مرۆڤەکاندا بەبێ گوێدانە جیاوازییان لە بیر و ڕا و ئایینیاندا".