بەپێی هەواڵی کوردپرێس، سەڵاحەدین دەمیرتاش لە هەژماری تایبەتی خۆی لە تۆڕی کۆمەڵایەتی تویتەر بڵاویکردەوە: "13هەمین سەرۆک کۆماری تورکیا کلیچدارئۆغڵو، خوا رێگەکەت واڵا بکات، لە ناخی دڵەوە باوەڕم وایە کۆتایی بە جیاکاری دەهێنیت، ئاشتی دەستەبەر دەکەیت و تورکیا بەرەو بەختەوەری و ئارامی دەبەیت".

هاوکات وێنەیەکی کلیچدارئۆغڵوی بە لۆگۆی سەرۆکایەتیی کۆمارەوە بڵاو کردوەتەوە و دەڵێت، "دەنگی من بۆ ئێوەیە".

 بڕیارە 14ی ئەم مانگە هەڵبژاردنی پەرلەمان و سەرۆکایەتی تورکیا بەڕێوە بچێت، کەمال کلیچدارئۆغڵو کاندیدی ئۆپۆزسیۆنە بۆ سەرۆکایەتی کۆمار لە دژی رەجەب تەیب ئەردۆغان، سەرۆکی ئێستا و کاندیدی ئاکپارتی و مەهەپە.

هەروەها مانگی رابردووش، میتحەت سانجار، هاوسەرۆکی پارتی دیموکراتی گەلان (هەدەپە) رایگەیاند، "لەهەڵبژاردنی سەرۆکایەتی کۆماری تورکیا، ئێمە پشتگیری لە کەمال کلیچدارئۆغڵو کاندیدی هاوپەیمانی میللەت دەکەین".