کوردپرێس:

بەگوێرەی هەواڵێکی تەلەڤزیۆنی ڕووداو، ڕووداوەکانی ئەم دوایییەی عێراق وای کردووە کارە دیپلۆماسیی و سەربازییەکانی زۆربەی وڵاتان لە عێراق ئاستەنگی بۆ دروستبێت و ئەڵمانیا دەڵێت راھێنان بە ھێزە عێراقییەكان رادەگرێت.

تەلەڤزیۆنی ڕووداو ڕایگەیاند: "فەرماندەی ھێزەكانی سوپای ئەڵمانیا بە لیژنەی بەرگری لە پەرلەمانی فیدرالی ئەڵمانیا راگەیاندووە كە مەشق و راھێنانی ھیزە عێراقیەكان لە لایەن سوپای ئەڵمانیاوە راگیراوە".

بەگوتەی فەرماندەی ھێزەكانی سوپای ئەڵمانیا ئەم بڕیارە بۆ پاراستنی ھێزەكانی ئەڵمانیا دراوە. ئێستا 27 راھێنەری ئەڵمانیا لە بنكەی تاجی و 90 راهێنەر لە ھەرێمی كوردستانن.

ئەم بڕیارەی ئەڵمانیا لە کاتێکدایە چەندین وڵاتی ئەورووپی و لەوان ئەڵمانیا لە 2014 کە شەڕی داعش دەستی پێکردووە هێز و ڕاوێژکاری سەربازییان ناردۆتە ناوچەکە و لە عێراق و هەرێمی کوردستانیش مەشق بە هێزی عێراقی و هێزی پێشمەرگە دەکەن.