بەپێی هەواڵی کوردپرێس، كۆسرەت رەسوڵ عەلی، سەرۆكی ئەنجومەنی باڵای سیاسی و بەرژەوەندیی یەكێتی لە پەیامێكدا بەبۆنەی هاتنی ساڵی نوێی 2020 رایگەیاند: "ساڵی 2019 و ساڵانی پێشوو بۆ هەرێمی كوردستان و كورد قۆناغی سەخت و دژوار بوو، بە خۆڕاگری ئێوە و قارەمانێتی هێزی پێشمەرگەی كوردستان توانیمان بەسەر بەشێک لە كێشەكان زاڵ بین و مەترسیی داعش لە كوردستان دوور بخەینەوە".

سەرۆكی ئەنجومەنی باڵای سیاسی و بەرژەوەندی یەكێتی دەشڵێت: "ئێستا كە كوردستان و عێراق بە دۆخێكی یەكجار هەستیار و مەترسیداری ناوخۆیی و ناوچەیی و نێودەوڵەتی تێپەڕدەبێ، كاریگەرییەكانی ئەم ڕووداوانە لەسەر كوردستان كەم نین و ئەگەر كورد خۆی بۆ ئەگەر و گۆڕانكارییەكان ئامادە نەكات تووشی ڕووداوی نەخوازراو دەبین".

كۆسرەت رەسوڵ بە ئەركی هێز و لایەنە سیاسییەكانی داناوە یەكدەنگ و یەكهەڵوێست بن و ساز و ئامادەبن بۆ هەر ئەگەرێک كە دێتە پێش بە جۆرێک بەرژەوەندیی باڵای گەل بخەنە پێش هەر جۆرە بەرژەوەندییێكی كەسی و حزبی و جەخت دەکاتەوە: "تەنها و تەنهاش دەتوانین بە یەكڕیزی زاڵ بین بەسەر كێشەكاندا".

کۆدی هەواڵنێر: 60113