کوردپرێس:

لە درێژەی هێرشەکانی تورکیا بۆ سەر خاکی هەرێمی کوردستان بە بیانووی بوونی هێزەکانی پەکەکە، سوپای تورکیا ناوچەی سنووری شارۆچکەی سیدەکانی تۆپباران کردەوە.

ئیحسان چەلەبی، بەڕێوەبەری شارۆچکەی سیدەکان لەو بارەیەوە بە ڕووداوی راگەیاند، فڕۆكه‌كان له‌كاژێر 02:35 خوله‌كه‌وه‌ هاتوونه‌ته‌ ئاسمانی ناوچه‌كه ‌و سه‌ره‌تای بۆردوومانكردنیشیان له‌ كاژێر 03:00 بووە و به‌چڕی هه‌ردوو به‌رزاییه‌كانی كانی دێزان و سه‌ری زراران ـیان له‌ سنووری گوندی خه‌لیفان بۆردوومانكردووە.

بە گوتەی ئیحسان چەلەبی، دوای بۆردوومانه‌كه‌ش تۆپخانه‌كانی سوپای توركیا هه‌مان ئه‌و ناوچانه‌یان تۆپبارانكردووە كه‌ فڕۆکەکان بۆردوومانیان كردبوو.

بەڕێوەبەری شارۆچکەی سیدەکان ئاماژەی بەوەش کرد، تاوەکوو نزیك كاژێرێك فڕۆكه‌كان چوار جار بۆردوومانی ده‌وروبه‌ری گوندی خه‌لیفانیشیان كردووه‌، تۆپخانه‌كانیش ناوه‌ ناوه‌ تۆپبارانی ده‌وروبه‌ری هه‌مان گوند ده‌كه‌ن.

هاوکات جه‌لال عوبه‌ید، موختاری گوندی خه‌لیفان به‌ رووداوی گوت، دوو ساڵه‌ گونده‌كه‌یان لەلایه‌ن فڕۆكه‌ و تۆپخانه‌كانی توركیا كراوه‌ته‌ ئامانج و هیچ كات وه‌ك ئه‌مجاره‌ نزیك ئاوه‌دانییه‌كان بۆردوومان و تۆپباران نه‌كراوه.

موختاری گوندی خه‌لیفان ڕاشیگەیاند، بەهۆی بۆردوومان و تۆپبارانەکەوە گوندنشینان ترس و دڵه‌راوكێیان لا دروست بووه ‌و به‌شێك له‌ خه‌ڵكی ماڵەکانیان بەجێهێشتووه‌.