بەپێی هەواڵی کوردپرێس، دوای کۆتایی هاتنی کۆبوونەوەکەی شاندی حکوومەتی هەرێمی کوردستان و حکوومەتی فیدڕاڵی عێراق؛ حکوومەتی هەرێم لە راگەیەنراوێکدا دەڵێت، لە کۆبوونەوەکەدا ئاوات جەناب نووری، وەزیری دارایی و ئابووری حکوومەتی هەرێمی کوردستان و سەرۆکی شاندەکە، دید و تێڕوانینی حکوومەتی هەرێمی کوردستانی سەبارەت بە ڕەشنووسی یاسای نەوت و غازی حکوومەتی فیدراڵ خستەڕوو.

وەزیری دارایی باسی لەوە کردووە، "حکوومەتی هەرێمی کوردستان ئامانجیەتی لەگەڵ حکوومەتی فیدراڵ بگاتە ڕێکەوتن بۆ داڕشتنی یاسایەک کە لە چوارچێوەی دەستوور و لە خزمەت هەموو پێکهاتە و هاوڵاتیانی عێراق و هەرێمی کوردستان دا بێت."

هەر لە کۆبوونەوەکەدا کەمال محەمەد، وەزیری سامانە سروشتییەکان بەوەکالەت، وردەکاری تێڕوانینەکانی حکوومەتی هەرێمی کوردستانی لە بارەی رەشنووسی پرۆژە یاساکەوە خستوەتەڕوو.

بەمەبەستی بەردەوامیدان بە دانووستانەکان و گفتوگۆ کردن لەسەر بابەتە هەڵپەسێردراوەکانی نێوان هەرێمی کوردستان و حکوومەتی فیدراڵی، ئێوارەی ڕۆژی شەممە شاندی حکوومەتی هەرێمی کوردستان بە سەرۆکایەتی ئاوات جەناب نوری، وەزیری دارایی و ئابووری سەردانی بەغدای کرد.