فەرهاد تەلۆ سەرۆکی پارتی یەکێتیی لیبراڵی کوردستانی لە وەڵامی پرسیاری کوردپرێسدا کە ئایا دوای هەڕەشەکانی تورکیا بۆ هێرشکردنە سەر باکووری سووریا ئیدارەی خۆسەر بەنیازە لە دیمەشق نزیک بێتەوە، ڕایگەیاند: هێزەکانی سووریای دیموکرات و حزبە بەشداربووەکانی ئەم ئیدارەیە و ئێمەیش وەکوو پارتی یەکێتیی لیبراڵی کوردستانی هەر لە یەکەم ڕۆژەوە بڕوامان بە هێڵی سێیەم لە ڕووداوەکانی سووریا بوو.

ناوبراو لە درێژەی قسەکانیدا وتی: هەرگیز ڕاماننەگەیاندووە کە لەگەڵ دیمەشق گفتوگۆ ناکەین، چوونکە ئێمە بەشێکین لە سووریا و چەند ساڵێکە گفتوگۆکانمان درێژەی هەیە.

فەرهاو تەلۆ ئاماژه‌ی به‌وه‌ش کرد: سه‌باره‌ت به‌ هه‌ڕه‌شه‌کانی ئه‌م دواییه‌، له‌گه‌ڵ حکوومه‌تی ناوه‌ند گفتوگۆ ده‌که‌ین هه‌م سه‌باره‌ت به‌ پێکهێنانی ژووری ئۆپه‌راسیۆن و پرسە سه‌ربازییه‌کان، هه‌م له‌باره‌ی بابەتە دیپلۆماسی و سیاسییه‌کان.

تەلۆ ئاماژەی بەوەش کرد: لە چەند رۆژی رابردوودا گفتوگۆ لەگەڵ شاندی ئەمریکی و بەریتانی لەبارەی ئەو مەترسیانە کراوە، ژەنەڕاڵ مەزلووم عەبدیش لە فڕۆکەخانەی قامیشلۆ لەگەڵ شاندی ڕووسیا کۆبوونەوەی هەبووە.

ناوبراو وتیشی: ئێمە بڕوامان بە دیالۆگ هەیە لەگەڵ هەموو لایەک، بەڵام دژی دروستکردنی ئەو ناوچەیەین کە ئەردۆغان پلانی هەیە لە باکووری سووریا دروستی بکات.

سەرۆکی پارتی یەکێتیی لیبراڵی کوردستانی زیادی کرد: داوا لە ئەمریکا و بەریتانیا و فەڕەنسا و ڕووسیا دەکەین ناوچەی دژە فڕین لە ئاسمانی باکووری سووریادا ڕابگەیەنن.