بەپێی هەواڵی کوردپرێس، فەریق جەمال محەمەد، سەرۆکی ئەرکانی وەزارەتی پێشمەرگە پێشوازیی لە کۆڵۆنێڵ تاد برۆس، گەورە راوێژکاری هێزەکانی هاوپەیمانان لە عێراق و شاندێکی یاوەری کرد.

لە دیدارێکدا، باس لە بارودۆخی ئەمنی و سەربازی ناوچەکە بە گشتی و عێراق و هەرێمی کوردستان بەتایبەتی کرا، هاوکات تیشک خرایە سەر پەیوەندی و هەماهەنگی بەردەوامی نێوان پێشمەرگە و هێزەکانی هاوپەیمانان.

هەر لە دیدارەکەدا، ئاماژە بە هەنگاوەکانی پێکهێنانی دوو لیوا هاوبەشەکەی نێوان سوپای عێراق و هێزەکانی پێشمەرگە کرا‌، تیایدا، بەگرنگیەوە باس لەکاری هاوبەشی ئەو دوو هێزە لە سنووری ناوچە ئەمنیە هاوبەشەکان کرا.

لەلایەن خۆیەوە، سەرۆکی شاندی میوان سەردانەکەی ئەم دواییەی شاندی راگەیاندنی وەزارەتی پێشمەرگە بۆ بەغدا و کۆبونەوەیان لەگەڵ شانەی راگەیانی عێراقی بەگرنگ وەسف کرد، بۆ پتەوکردنی پەیوەندی نێوان هەردوولا.