بەپێی هەواڵی کوردپرێس، عەبدوڵڵا ئاکرەیی بەڕێوەبەری پەیوەندییەکانی نێوان هەرێم و ئێران بە ماڵپەڕی فەرمیی پارتی وتووە: لە بەردەوامی گەڕاندنەوەی زیندانییەکان لە هەرێمەوە بۆ ئێران، تاوەکوو ئێستا 3 وەجبە نێردراونەتەوە، پێویستە زیندانی چەند مەرجێکی تێدا بێت کە حوکمی قەتعی زیندانی هەبێت و هیچ کەسێک سکاڵای لەسەر نەکردبێت، هەروەها زیندانی سیاسی نەبێت و بە رەزامەندی خۆی بگەڕێتەوە بۆ ئێران.

ناوبراو روونیشیکردووەتەوە، وەجبەی سێیەم 10 زیندانی ئەو مەرجانەیان تێدا بوو بۆ ئەوەی رادەست بکرێنەوە و بە ئامادەبوونی بەرپرسانی هەردوولا و جێگری وەزیری داد و چوار دادوەری ئێرانی، زیندانییەکان رادەست کران.

عەبدوڵڵا ئاکرەیی سەبارەت بە ژمارەی ئەو زیندانییە ئێرانیانەی لە هەرێم ماون هێمای بۆ ئەوە کردووە، 25 زیندانی دیکە ماون کە حوکمی کۆتاییان لێ درا ئەوانیش رادەست دەکەنەوە، ئەوانەشی رادەست کراونەتەوە وەجبەی یەکەم 90 زیندانی بوون و وەجبەی دووەم 35 و سێیەمیش 10 زیندانی بوون.

بەڕێوەبەری پەیوەندییەکانی هەرێم و ئێران لە بەشێکی تری قسەکانیدا ئاماژەی بەوەداوە، ئەوانیش باسیان لەوە کرد کە هەندێک زیندانی لای ئەوان هەن کە پەناهەندەن و ماڵیان لە ئێرانە و لەسەر داواکاری خۆیان ناگەڕێنەوە بۆ کوردستان، هەروەها بەشێکی دیکەش هەن لێیان دەکۆڵنەوە ئەگەر خەڵکی هەرێم بن ئامادەن بیانگەڕێننەوە.