بەپێی هەواڵی کوردپرێس، به‌گوێره‌ی راگه‌یه‌ندراوێکی نووسینگه‌ی راگه‌یاندنی ره‌وتی سه‌در، ئه‌مشه‌و موقته‌دا سه‌در به‌سه‌ردانێک گه‌یشتوه‌ته‌ به‌غدای پایته‌خت و بڕیاریشه‌ ژماره‌یه‌ک دیدار و کۆبوونه‌وه‌ تایبه‌ت به‌ پێکهێنانی حکوومه‌تی نوێی عێراق ئه‌نجام بدات.

به‌گوێره‌ی میدیاکانی عێراق، چاوه‌ڕوانده‌کرێت موقته‌دا سه‌در ژماره‌یه‌ک دیدار و کۆبوونه‌وه‌ له‌به‌غدای پایته‌خت تایبه‌ت به‌ پێکهێنانی حکوومه‌تی نوێی عێراق ئه‌نجام بدات.

یه‌کێک له‌کۆبوونه‌وه‌ چاوه‌ڕوانکراوه‌کانی موقته‌دا سه‌در له‌گه‌ڵ هادی عامری سه‌رۆکی هاوپه‌یمانی فه‌تح ده‌بێت تایبه‌ت به‌ پێکهێنانی حکوومه‌ت و توانه‌وه‌ی به‌سته‌ڵه‌کی ناکۆکییه‌کان.

موقته‌دا سه‌در رێبه‌ری ره‌وتی سه‌در جه‌خت له‌سه‌ر پێکهێنانی حکوومه‌تی زۆرینه‌ی نیشتمانی ده‌کاته‌وه‌، بۆئه‌و مه‌به‌سته‌ش هاوپه‌یمانێتی له‌گه‌ڵ سوننه‌کان عه‌زم و ته‌قه‌دوم و پارتی دیموکراتی کوردستان هه‌یه‌، لایه‌نه‌ شیعیه‌ ناڕازیه‌کانیش که‌ "چوارچێوه‌ی هه‌ماهه‌نگی"یان پێکهێناوه‌ جه‌خت له‌سه‌ر پێکهێنانی ته‌وافوقی نیشتمانیی و به‌شداریپێکردنی سه‌رجه‌م هێزه‌ سیاسییه‌کان له ‌حکوومه‌تی نوێ ده‌که‌نه‌وه‌.