بەپێی هەواڵی کوردپرێس، بەرهەم ساڵح سەرۆک کۆماری عێراق بەبۆنەی سەری ساڵی نوێی زاینیی لەهەژماری فەرمی خۆی لەتویتەر پەیامێکی بڵاوکردوەتەوە و باسی لەوەشکردوە، لەکاتێکدا پێشوازی لە ساڵی نوێ دەکەین، ئاوات و خواستی گەلەکەمان لەگەڵ خۆیدا دەهێنێت کە لەپێناویدا نەهامەتی و دژواری جۆراوجۆری بینیوە، ئەویش هەڵگری پەیامی پاراستنی نیشتیمان، دەستکەوتەکانی چاکسازییە لەگەڵ مافی ژیانێکی شایستەیە.

ئاماژەی بەوەش کردووە، لە ساڵی نوێدا حکومەتی نوێی عێراق پێکدەهێنرێت، دەبێت لە ئاست توانای دەوڵەتێکدا بێت کە دەمانەوێت لەگەڵ خەڵک و دراوسێکانیدا حکومەتی ئاشتی و خاوەن پەیوەندییەکی تەندروست بێت.

بەرھەم ساڵح، لەبەشێکی دیکەی پەیامەکەیدا کە بەزمانی کوردی لەتویتەر بڵاویکردوەتەوە، نوسیویەتی، "ساڵی نوێی زایینی پیرۆز لە خۆتان و کەسوکار، و بەهیوای سەرفرازی گەل، و چارەسەربونی کێشە و گرفتەکان و بەدیهێنانی مافە ڕەواکانی خەڵک لە خۆشگوزەرانی و ئاسودەیی و ئاشتەوایی".