بەپێی هەواڵی کوردپرێس، ئەیھان سەعید، نوێنەری زیندانیانی بادینان ڕوونکردنەوە و داواکاری ژمارەیەک لە زیندانیانی بادینان بڵاوکردەوە و ڕایگەیاند: ژمارەیێک زیندانی بادینان کە خەڵکی شێلادزێن لەگەل چەند زیندانیەکی دیکەدا ماوەی ٣ رۆژە دەستیان بە مانگرتن کردووە لە خواردن و دۆخیان باش نیە.

ئەو ڕوونکردنەوەی ئەو زیندانیانەی بڵاوکردووەتەوە و کە دەڵێن: لەسەرەتای رفاندنمان لە لایەن ھێزە ئەمنیەکانەوە زۆر بە توندی ئەشکەنجە دراوین و لەژێر ھەڕەشە و تەعزیبدا دانپێدانانیان لەسەر ھەندێک تاوان پێ کردووین و ڤیدیۆ کراوین و بڵاویش دەکەنەوە.

ئەو زیندانیانە باس لەوە دەکەن کە بێ جگە لەوەی رێگەیان پێ نادەن پارێزەرەکانیان ببینن، شەڕی دەرونیان لەگەڵ دەکرێت و دەشڵێن لەکاتی لێکوڵینەوەدا گشت وتە و ئیفادەکانمان گۆڕدراون و پێیان ئیمزا کردووین کە نەمان زانیوە چی نووسراوە.

ئاشکرای دەکەن کە ماوەی سێ ڕۆژە دەستیان بە مانگرتن کردووە لە خواردن و داوا لە UN و رێکخراوە ناوخۆیی و جیھانیەکانی مافی مرۆڤ، میدیاکان، پەرلەمانتاران، لایەنە سیاسیەکان و گشت خەڵکی کوردستان دەکەن کە فریامان کەون و دۆخمان زۆر خراپە.