بەپێی هەواڵی کوردپرێس، محەمەد شیاع سوودانی سەرۆک وەزیرانی عێراق بە تەلەفۆن لەگەڵ هەریەکە لە مەسعوود بارزانی سەرۆکی پارتی، نێچیرڤان بارزانی سەرۆکی هەرێمی کوردستان، مەسروور بارزانی سەرۆکی حکوومەتی هەرێم و بافڵ تاڵەبانی سەرۆکی یەکێتی قسەی کرد.

نووسینگەی محەمەد شیاع سوودانی ڕایدەگەیێنێت: سەرۆک وەزیران سوپاسی هەڵوێستی سەرکردە و هێزەکانی کوردستانی کرد کە بەشداربوون لە بەدیهێنانی رێککەوتنی ئەمدواییە بۆ دەستپێکردنەوەی هەناردەی نەوتی خاوی وەبەرهێنراوی هەرێم و ڕادەستکردنی داهاتەکانی بە خەزێنەی ناوەندیی و داکۆکی لە بەرژەوەندییەکانی گەلی عێراقمان لە هەموو شوێنێک و هەوڵە هاوئاهەنگەکانی نێوان حکوومەتی فیدراڵ و حکوومەتی هەرێم، کە بە رێککەوتن لەسەر بنەمای دەستوور و یاسای بوودجە کۆتایی هات. 

ئاشکراشی دەکات لەو پەیوەندییانەدا جەختکرایەوە لەسەر پاراستنی سامان و دابەشکردنی دادپەورەرانەی بۆ هەموو رۆڵەکانی گەلی عێراق لەسەرتاسەری وڵات.

دەشڵێت: لە پەیوەندییەکاندا جەخت لەسەر پاڵپشتی وەبەرهێنان لە عێراق کرایەوە، بەوپێیەی بزوێنەری سەرەکی خوڵقاندنی گەشەپێدانی هەمەلایەن و گۆڕانکاریی چۆنایەتییە لە ئابوری عێراقدا.