کوردپرێس:

ڕۆژی پێنجشەمە 6ی سەرماوەزی 1399 حەسەن ڕۆحانی سەرۆککۆماری ئێران بەشداریی کردنەوەی سێ پڕۆژەی زەبەلاحی کۆمپانیای نەوتی نیشتمانیی ئێرانی کرد و لە لێدوانێکدا کە بە ڤیدیۆ کۆنفڕانس پێشکەشی کرد تیشکی خستە سەر دۆخی ئابووریی ئێران و ئەو کێشانەی لەبارەی ئابوورییەوە بە هۆی سزاکانی ئەمریکاوە داوێنی ئێرانی گرتووە.

ڕۆحانی لە لێدوانەکەیدا ڕایگەیاند ئەو پڕۆژەیەی ئێستا دەکرێتەوە بە ڕێژەی 30 هەزار ملیار تمەن پارەی بۆ سەرف کراوە و ئەوەش دەیسەلمێنێت کە پێچەوانەی بۆچوونی دوژمنانی ئێران، ئەو وڵاتە بە ئەو پەڕی توانایەوە بەردەوامە لە وەبەرهێنان و پێشخستنی ئابوورەکەی.

سەرۆککۆماری ئێران گوتیشی: ئێران دەتوانێت بە بەهایێکی ئێجگار کەمتر کۆی پێداویستییەکانی ناوچەکە دابین بکات و ئابووری ئەو وڵاتە بەرەو ئابووری بێ نەوت ڕۆشتووە و ئەوەش یارمەتیدەر بووە لە پێشخستنی کەرتی ئابووریی وڵاتەکە.