لەدوای پەیامەکەی ئۆجەلانەوە، تورکیا ۷ جار هەرێمی کوردستانی بۆردوومان کردووە
پوختەی هەواڵ
کوردپرێس: کامەران عوسمان، ئەندامی تیمی کوردستانی عێراقی رێکخراوی تیمەکانی دروستکەری ئاشتیی کۆمەڵگە (CPT)ی ئەمریکی، بە رووداوی ڕاگەیاند: "لەدوای پەیامەکەی ئۆجەلانەوە، تورکیا ۷ جار هەردوو سنووری پارێزگاکانی دهۆک و هەولێری بۆردوومان کردووە."
بەگوێرەی ئامارەکەی سی پی تی، لە کەمتر لە ۴۸ کاژێری ڕابردوودا: "تورکیا جارێک خواکوڕک و جارێکیش خنێرەی لە سنووری سیدەکان لە پارێزگای هەولێر بۆردوومان کردووە."
بەگوتەی کامەران عوسمان، "پێنج بۆردوومانەکەی دیکە لە پارێزگای دهۆک بوون؛ دووانیان لە چیای گارە و سێ بۆردوومانەکەی دیکەش لە مەتین بوون، بەتایبەت لە سنووری گوندەکانی گوهەرزێ و کانی بەلاغە".
دەستپێکردنی پرۆسەی ئاشتی لەکاتێکدایە، هەر بەگوێرەی ئاماری سی پی تی، "لە ۹ مانگی ساڵی رابردوودا تورکیا نزیکەی هەزار و ۶۰۰ جار هەرێمی کوردستانی بۆردوومان کردووە."
کامەران عوسمان گوتی، "لە ۰۱-۰۱-۱۹۹۱ـەوە ۷۲۰ هاونیشتمانی بوونەتە قوربانیی بۆردوومانەکانی تورکیا، کە ۳۵۳ـیان کوژراون و ۳۶۷ـیشان بریندارن".
بۆچوونی بەکارهێنەران