بەپێی هەواڵی کوردپرێس، ڕەجەب تەییب ئەردۆغان سەرۆکی تورکیا له ‌په‌یامێكدا دوای کۆبوونەوەی کابینەی حکوومەتەکەی ڕایگەیاند: "ئەوانەی بیر لە کانتۆن ‌و بیرۆکەی جوداخوازی دەکەنەوە، باجەکانیان چەند هێندەی دیکە قورستر دەبێت و شەوێک لەناکاو بەسەریاندا دەدەین".

ناوبراو وتیشی: "ئەگەر لەبارەی یەکپارچەیی خاکی سووریاوە هەست بەمەترسی بکەین، لەڕێگەی ئۆپەراسیۆنی سەربازییەوە شەوێک لەناکاو دەچینەوە ناو خاکی سووریا، هەر هەڕەشەیەک لەلایەن هەسەدە و پەکەکەوە بۆسەر یەکپارچەیی سووریا دروست بێت، شەوێک لەناکاو دەچنە سووریا و به‌سه‌ریاندا ده‌ده‌ین، ئەگەر ڕێگریی لەقۆناغی نوێ-ش بکرێت، بەمستی ئاسنینەوە وەڵامدەدەینەوە".

ئەردۆغان وتیشى: "ئەو لایەنانەی دەیانەوێت دۆخی ئێستای سووریا بقۆزنەوە و ئەوەی لە خەیاڵیاندایە بە ئەنجامی بگەیه‌نن، تورکیا لە خاڵی پاراستنی مانەوەی خۆی زۆرجار ئیرادەی بەهێزەوە نیشان داوە، کاربگاتە ئەو ڕادەیە، دووبارە شەوێک لەناکاو بەسەریاندا دەدەین".

سەرۆک کۆماری تورکیا ئه‌وه‌شى وت: "ئێستا ترس لە ئەگەری گۆڕانکارییەکانی نەخشەی ڕۆژهەڵاتی ناوەڕاست هەیە، لە سووریا و تەواوی ناوچەکە قۆناغێکی نوێ دەستیپێکردوە، چاوەڕوانیمان ئەوەیە، سووریا یەکپارچەیی خاک ‌و سەروەریی خۆی بپارێزێت، ڕێگە نادەین ئەو وڵاتە دابەشبێت، هەر مەترسییەک لەسەر یەکپارچەیی خاکی سووریا ببینین، هەنگاوی پێویست دەگرینەبەر".