بەپێی هەواڵی کوردپرێس، سەرکۆماری تورکیا ڕەجەب تەییب ئەردۆغان دوای کۆبوونەوەی کابینەی سەرکۆماریی لەبارەی پرسەکانی ئەمدواییەی تورکیاوە وتی: دارودەستە تیرۆریستەکان ناتوانن سیاسەتی تورکیا دابڕێژنەوە. ناتوانن لە نێوان ٨٥ ملیۆن کەسدا دیواری ناکۆکی دروست بکەن. ناتوانن وڵاتەکەمان لەو ڕێڕەوە لابدەن".

سەرۆک کۆماری تورکیا هەروەها باسی لە هێرشە چەکدارییەکەی سەر دامەزراوەی پیشەسازیی فڕۆکەوانی و بۆشایی ئاسمانی تورکیا (TUSAŞ) لە ئەنقەرە کرد کە ڕۆژی ٢٣ی تشرینی یەکەم ئەنجام درا و لەم بارەیەوە وتی: "ئەوە دەردەکەوێت، ئەو داردەستە تیرۆریستانەی بە خوێنڕشتن دەژین، وەک خزمەتکارێک بەدوای ئاغای نوێ و نۆکەرایەتیاندا دەگەڕێن. وەک کۆماری تورکیا ئەو پەیامەی کە بە ڕێگەی ئەو هێرشە تیرۆریستییەی دەیەویست بگات، پووچەڵ و خستمانە تەنەکەی خۆڵەوە".

ئەردۆغان ڕاشیگەیاند: "دوای هێرشە تیرۆریستییەکەی ئەنقەرە (TUSAŞ)، ٤٧٠ خاڵی ڕێکخراوی تیرۆریستی کراوەتە ئامانج و ٢١٣ تیرۆریست لە چالاکی خراوە".

 ئەردۆغان وتیشی: "ئامادە نین هیچ پەیامێک لە تیرۆریستان، بکووژە خوێنمژەکان و خاوەنەکانیان کە بەکاریان دەهێنن، وەربگرین. داردەستە تیرۆریستەکان ناتوانن سیاسەتی تورکیا دابڕێژنەوە. ناتوانن لە نێوان ٨٥ ملیۆن کەسدا دیواری ناکۆکی دروست بکەن. ناتوانن وڵاتەکەمان لەو ڕێڕەوە لابدەن".

سەرۆک کۆماری تورکیا بەشێکی دیکەی قسەکانی تایبەت کرد بە سیاسەتی دەرەوەی وڵاتەکەی و لەم بارەیەوە گوتی: "هەر شوێنێک بەرژەوەندییەکانی تورکیای لێ بێت، دەچین. بەرژەوەندییەکان هەرچییەک بێت، بەو ئاراستەیەدا پەرە بە پەیوەندییەکانمان دەدەین. ئەوە بڕبڕەی پشتی سیاسەتی دەرەوەمانە. پەرەسەندنی پەیوەندییەکانمان لەگەڵ BRICS، هەرگیز بە مانای بەدیلێک بۆ پەیوەندییەکانی دیکەمان نییە و ناشبێت. گۆڕانکاری لە هەڵوێستماندا ناکەین، بە پێچەوانەوە لە هەوڵداین بۆ جێگیرکردنی پێگەی شایستەی تورکیا لەهەر چەشنە گۆڕانکارییەک لە سیستەمی جیهانیدا".

ناوبراو گوتیشی: "پێشکەوتنەکانی خۆمان لە بواری پیشەسازی بەرگریی کە جێی شانازیی وڵاتەکەمان لە جیهاندایە، بە پێداگرییەوە بەردەوامی پێ دەبەخشین".