بەپێی هەواڵی کوردپرێس، ڕۆژی ۳۰ی حوزەیران شاندێک لە هەرێمى کوردستانەوە بەسەرۆکایەتى هەریەک لە رێبەر ئەحمەد، وەزیری ناوخۆ و ئاوات شێخ جەناب، وەزیری دارایی و ئابووری و بە ئەندامیەتى بەڕێوەبەری گشتیی گومرگ لە هەرێمی کوردستان سەردانى بەغدادیان کرد، لە حکوومەتی عێراقیش وەزیرانی ناوخۆ و داد و ئاوەدانکردنەوە و خوێندنی باڵا و بەرپرسانی دەستەی دەروازە سنووریەکان ئامادەی بوون.

وەزارەتى دارایى هەرێمى کوردستان، یەکى تەمموز ڕایگەیاند: لە کۆبوونەوەکاندا گفتوگۆ لەسەر ئەو کێشە و گرفتانە کراوە کە لە بواری گومرگ و خاڵە سنوورییەکان لەنێوان هەردوولا هەن و جەخت لەسەر جێبەجێ کردنی خاڵەکانی کۆنووسی کۆبوونەوەکانی ڕابردوو کرایەوە، وەک نەخشەڕێگای چارەسەری کێشەکان.

بەگوێرەى وەزارەتى دارایی هەرێمى کوردستان، شاندی هەردوولا هاوڕابوون کە یەک سیاسەتی گومرگی لەسەر ئاستی عێراق و هەرێمی کوردستان جێبەجێ بکرێت و هەماهەنگیی زیاتر بکرێت بۆ پاراستی بەرهەمی ناوخۆ، بۆ ئەو مەبەستەش بڕیارە هەماهەنگی و کۆبوونەوەکان بەردەوامیان هەبێت، تاوەکو گەیشتن بە رێککەوتنی کۆتایی.