بەپێی هەواڵی کوردپرێس، کۆمسیۆنی باڵای سەربەخۆی هەڵبژاردنەکان لە باکوور و باکووری ڕۆژهەڵاتی سووریا ڕاگەیەندراوێکى بڵاوكرده‌وه‌ و دواخستنی هەڵبژاردنی ئەنجومەنی شارەوانییەکانی بۆ مانگی ئاب (هەشت)ی ئەمساڵ ڕاگەیاند.

وا بڕیاربوو هەڵبژاردنەکە ۱۱ی ئەم مانگە، بۆ جاری یەکەم لەدوای دامەزراندنی هێزەکانی سووریای دیموکرات (هەسەدە)، لە ۱۵۱ شار و شارۆچکەی کوردستان ‌و ناوچەکانی ژێر دەسەڵاتی (هەسەدە) بکرێت.

کۆمسیۆنەکە هۆكارى دواخستنى هه‌ڵبژاردنى ئاشكرا كردووه‌ و نووسیویه‌تى: "لەماوەی ڕابردوودا ژمارەیەک هێز و لایەنی سیاسیی بەشدار لە هەڵبژاردن ‌و پرۆسەی سیاسی لە کوردستان ‌و ناوچەکانی ژێر دەسەڵاتی (هەسەدە)، داوای دواخستنی هەڵبژاردنی ئەنجومەنی شارەوانییەکانیان کردبوو، بۆیە ئێمه‌ش لەوەڵامی داواکارییەکەیان، هەڵبژاردنەکەمان دواخست".

کۆمسیۆنی باڵای هەڵبژاردنەکان لەڕۆژئاوای کوردستان ئه‌وه‌شى ڕونكردوه‌ته‌وه‌، کەمیی ماوەی بانگەشەی هەڵبژاردنی کاندیدان‌ و ڕەخساندنی کات بۆ قسەکردن لەگەڵ دەزگا و ڕێکخراوە نێودەوڵەتییەکان بەمەبەستی چاودێریی کردنی هەڵبژاردنە، دوو هۆی دیکەی دواخستنی هەڵبژاردنەکە بوون.

کۆمسیۆنەکە پێشتریش ڕایگەیاندبوو، زیاتر لەسێ ملیۆن کەس مافی دەنگدانیان لە هەڵبژاردنەکەدا هەیە، ئەو کۆچبەر و پەنابەرانەی زیاتر لە پێنج ساڵە لە ناوچەکانی بەڕێوەبەرایەتیی خۆسەر نیشتەجێن، مافی دەنگدانیان دەبێت.

وا بڕیارە ۱۸ لایەن‌ و هاوپەیمانی سیاسیی بەشداریی لە هەڵبژاردنی ئەنجومەنی شارەوانییەکان بکەن، به‌ڵام ئەنجومەنی نیشتیمانیی کورد لە سووریا ناسراو به ‌(ئەنەکەسە)، بڕیاریداوە بەشداریی ئه‌و هه‌ڵبژاردنه‌ نەکات.