بەپێی هەواڵی کوردپرێس، نەسروڵڵا ڕەشنودی، کۆنسووڵی گشتیی ئێران لە هەولێر لە کۆنفرانسێکی رۆژنامەڤانیدا ڕایگەیاند، دوای ڕاگەیاندنی هەواڵی کۆچی دوایی سەرۆککۆمار و وەزیری دەرەوەی ئێران، کۆمەڵێک پەیامی سەرەخۆشییان لە بەرپرسانی هەرێمی کوردستان، ناوچەکە و جیهان پێگەیشتووە.

نەسروڵڵا ڕەشنوودی وتیشی: "ئەمە ڕووداوێکی گەورە بوو بۆ کۆماری ئیسلامی ئێران، بەڵام لەسەر بنەمای دەستووری ئێران و ڕەزامەندی ڕێبەری ئێران، دەستبەجێ محەممەد موخبیر، جێگری یەکەمی سەرۆک کۆمار، وەکوو بەڕێوەبەری دەستەی بەڕێوەبەرایەتی وڵات دەستبەکاربوو و ئێستا حکوومەت لەسەر سکەی خۆی دەڕوات".

سەبارەت بە رێوڕەسمی پرسەی قوربانییانی ڕووداوەکە، نەسروڵڵا ڕەشنوودی وتی: "رێبەری کۆماری ئیسلامی لە پەیامێکدا پێنج رۆژی وەکوو ماتەمینی گشتی ڕاگەیاندووە و هەر بەم پێیەش ئێمە ئاڵاکەمان نیوە شەکاوە دەبێت و بۆ ماوەی پێنج ڕۆژ، هاوکات لە ڕۆژی ۲۱ی ۵ی ۲۰۲۴ەوە دەفتەری یادەوەری بۆ ماوەی سێ ڕۆژ لە کاژێر ۰۹:۰۰ـی بەیانی تاوەکوو ۰۴:۰۰ـی ئێوارە دادەنێین و پێشوازی لە میوانە ئازیزەکان، کەسایەتییەکان، نوێنەرایەتی وڵاتان لە هەرێمی کوردستان و بەرپرسانی هەرێم و حیزب و لایەنەکان و ئێرانییەکانی دانیشتووی ئێرە دەکەین".

کۆنسوڵی ئێران وتیشی: "هەموو لایەنەکانی ئەو رووداوە لەژێر لێکۆڵینەوەدایە، بەڵام وەکوو دیارە ڕووداوەکە بە کارەساتێکی سرووشتی و بەهۆی نالەباربوونی کەشوهەوا ڕوویداوە، بەڵام ئەگەر دەپرسن ئێران گومانی لە هیچ وڵاتێک هەبێت لەوەی دەستی لە ڕووداوەکە هەبێت، من ئاگاداری ئەمە نیم".