بەپێی هەواڵی کوردپرێس، سەعدی پیرە، وتەبێژی یەکێتیی نیشتمانیی کوردستان، دەڵێت: "ئەوەی لە هەولێر ڕوویداوە پەیوەستە بە پرسی ئەمنییەوە و لە کۆبوونەوەی ئەمجارەدا کە لە داهاتویەکی نزیک دەیکەین، ئەم پرسە دەبێتە یەکێک لە تەوەرەکانی گفتوگۆی نێوان یەکێتی و پاتی".

سەعدی ئەحمەد پیرە لە کۆبوونەوەی ئەنجومەنی سەرکردایەتی حزبەکەیدا وتیشی: "ئێمە لەکاتی هێرشە مووشەکییەکەدا ڕاگەیەندراوی مەکتەبی سیاسیمان هەبووە و بە کارێکی ناڕەوای دەزانن".

وتەبێژی یەکێتیی نیشتمانیی کوردستان وتیشی: "من بەدوری دەزانم هێرشێکی موشەکی لەم قەبارەیەدا بۆ سەر تاکەکەسێک بێت، ئەو پروپاگەندانەی لەسەر کەسەکە دەکرێت جێگەی گومانن، لەکاتێکدا ئەو کەسە لای ئێمە ناسراوەو پیاوێکی کاسبی شارەکەیە و پێمانوایە دوورە لەوەی ببێتە لانە بۆ کاری سیخوڕی".