بەپێی هەواڵی کوردپرێس، ژمارەیەک لە ژنان لەوان نوێنەرانی ڕێکخراوە ناحکوومییەکان لە دیاربەکر بە هۆی هێرشەکانی ئیسرائیل بۆ سەر فەلەستین لە حەوشەی مزگەوتی کورشوونلووی ناوچەی سوور مانگرتنیان بەڕێوە برد.

ژنان لەم مانگرتنەدا چەند لافیتەیان بە زمانی ئینگلیزی و تورکی بەرز کردۆتەوە کە ئەم دروشمانەی تێدا بوون «کاتێک کە منداڵەکان خەریکن دەکوژرێن نابێ بێدەنگ بن». ژنانی دیاربەکر بۆ ئازادیی فەلەستین و بۆ کەسانێک کە لە ئەم هێرشانەدا گیانیان لەدەست داوە، قورئانیان خوێندەوە. مانگرتنی ژنانی دیاربەکر هەتا ٣ ڕۆژ درێژەی پێ‌دەدرێت.

سومەیە بایرام یەکێک لە ئەو خاتوونانەی کە لە مانگرتنەکەدا بەشداریی کردبوو، وتی: ئێمە ئەمڕۆ وەکوو تاک و شەخس ناهەتووینەتە ئێرە؛ ئەمڕۆ ئێمە وەک ژنانی موسوڵمانی بەرپرس بۆ ئێرە هاتوین و دەمانهەوێ کە دەنگمان وەکوو (ژن) ببیسترێت. بۆ ئەوەی کە لە هەفتەی ڕابردوودا سەدان ژن و منداڵی فەلەستینی کۆمەڵ‌کوژی کراون و ئەم ڕەوتی کوژرانە هێشتا هەر درێژەی هەیە. ئێمە لە ئەم مانگرتنە بێدەنگەدا دەمانهەوێ دەنگی ژنانی فەلەستین بگەیێنینە گوێی هەموو جیهان.

سەرەڕای ئەمە لە ڕۆژانی ڕابردوودا شارە جیاوازەکانی کوردستانی تورکیە و بەتایبەت شاری دیاربەکر، شایەتحاڵی خۆپیشاندانی خەڵک و دەربڕینی ناڕەزایەتییان بۆ کوشتنی خەڵکی سڤیلی فەلەستین بووە.