بەپێی هەواڵی کوردپرێس، نیاز دەرگەڵەیی کادری پێشکەوتووی یەكێتی نیشتمانیی كوردستان لە رانیە لەنێو باخەكەی خۆیدا كوژرا.

باڵا هاوار برازای نیاز دەرگەڵەیی لە کۆنفرانسێکی ڕۆژنامەوانیدا زانیاریى نوێى له‌باره‌ى ڕووداوه‌كه‌وه‌ ئاشكرا كرد و وتى، "ئەم ڕووداوە ڕووداوێکی ئاسایی نییە، بەگوێره‌ى زانیاری پزیشکی دادی رانییە و له‌کردەوەیەکی تیرۆریستی مامم کوژراوه‌ و شوێنی سێ فیشەكیش بەسەرییەوە دیاره‌".

ناوبراو وتیشى، "تائێستا هۆکاری ڕووداوەکە نازانرێت، لەئێستادا هێزەکانی پۆلیس‌ و ئاسایشی ڕاپەڕین لێکۆڵینەوە دەکەن لەسەر ئەو کەیسە، هەروەها شوێنی ڕووداوەکەش لە باخەکەی خۆی بووە، به‌ڵام هه‌مووان دڵنیا ده‌كه‌ینه‌وه‌ هیچ جۆرە كێشه‌یه‌كمان لەگەڵ هیچ کەس‌ و لاینێک نەبووە تائێستا".

برازاكه‌ى نیاز ده‌رگه‌ڵه‌یی ئه‌وه‌شى وت، "پێش ئەوەی ڕووداوی کوشتنەکە ڕووبدات لەگەڵ خێزان‌ و منداڵەکانی بووە، دواتر خێزان‌ و منداڵەکانی دەرگەڵەیی چوونەتە سەردانی باخی ئامۆزای دایکیان‌ و خاڵیان، کاتێک کە گەڕاونەتەوە بینویانە ئەم ڕووداوە ڕووی داوە".