بەپێی هەواڵی کوردپرێس، مەسروور بارزانی لەوتەیەکدا ستایشی خۆڕاگری و قوربانیدانی پێشمەرگەی کرد کە وەک هەمیشە بەرگری لە دەسکەوتە نیشتمانییەکان و قەوارەی دەستوریی هەرێمی کوردستان دەکەن و وتی: "هەرێمی کوردستان، هەمیشە پابەندە بە دەستوور و ئەو ڕێککەوتننانەی بۆ چارەسەرکردنی کێشەکان لەگەڵ حکوومەتی فیدڕاڵ واژۆ کراون و لە هەمانکاتدا، دەستبەرداری مافە دەستورییەکانیشی نابێت".

سەرۆکی حکوومەت باسی لە کێشەی داگیرکردنی زەوی جووتیارانی کورد و تورکمانی لە ناوچە کوردستانییەکانی دەرەوەی ئیدارەی هەرێمی کوردستان کرد کە لەمبارەیەوە لەگەڵ سەرۆک وەزیرانی فیدراڵ لە پەیوەندیدا بووە و داوای کردووە سنوورێک بۆ ئەو پێشێلکارییە دابنرێت و سەرۆک وەزیرانی فیدڕاڵیش، هەندێک ڕێکاری گرتەبەر بۆ چارەسەرکردنی کێشەکە.

سەرۆکی حکوومەت وتیشی: "دەزانم کە ئەم میحوەرە میحوەرێکی زۆر زۆر سەرەکی بووە، بۆ پاراستنی قەوارەی کوردستان، دوای ئەوەی خیانەتی ۱۶ـی ئۆکتۆبەر کرا، ئێرە رێگر بوو لەوەی ئەم پلانە پیسە سەربکەوێت و قەوارەی کوردستان تێکبدات، ئەمە جێگەی دەستخۆشییە کە ئێوە توانیتان زاڵ بن بەسەر ئەو هەموو پیلانە خراپانەی کە لەلایەن ناحەزانەوە بۆ هەرێمی کوردستان دارێژرابوون و بەردەوامن لەوەی کە کوردستان بپارێزن".