بەپێی هەواڵی کوردپرێس، ئاژانسی فەرمی تورکیا بڵاوی کردووەتەوە، لە ئۆپراسیۆنێک لە دەوروبەری سلێمانی 3 بەرپرسی پەکەکە بەناوەکانی فەهمی ئۆغمەن کە بە "سینان دژوار" ناسراوە، هەروەها محەمەد ساڵح چاکاڵ کە بە "مەزڵووم کۆچەر" ناسراوە و ئەحمەد محەمەد عەلی کە بە "ئارارات تۆڵهەڵدان" ناسراوە، لە لایەن هەواڵگریی تورکیاوە کراوەنەتە ئامانج.

ئەوەش هاتووە، پرۆسەکە دوای کۆکردنەوەی زانیاری بووە لە رێگەی سیخوڕەکانیانەوە کە چاودێری جموجوڵی ئەو بەرپرسانەی پەکەکەیان کردووە و شوێنەکانیان دەستنیشان کردوون.

سەرچاوەیەکی ئاگادار ئاشکرای کردووە، دوو کەس لەو بەرپرسانەی پەکەکە چەند رۆژێک پێش ئێستا لە گوندی گوڵاڵە کراونەتە ئامانج کە ماتۆڕسکیلێکیان پێبووە، سەرچاوەیەک لە ئاسایشی سلێمانیش بە میدیای پارتی وتووە، لای ئەوان تەنها یەک کوژراو لەو رووداوە تۆمار کراوە و نازانن کەسی دووەم کێیە.

سەرچاوە: ڕادیۆ نەوا