بەپێی هەواڵی کوردپرێس، شەرق ئەلئەوسەت بڵاوی کردەوە لە کۆبوونەوەی 32هەمینی کۆمکاری عەرەبی لە شاری جەددە ڕەشنووسێک پەسەندکرا کە دەیان بابەتی پەیوەست بە کاروباری جیهانی و عەرەبی لەخۆگرتووە.

سەبارەت بە پرسی سووریا، لە ڕەشنوسی بەیاننامەکەدا جەخت لەسەر نوێ کردنەوەی پابەندبوون بە پاراستنی سەروەری و یەکپارچەیی خاک و سەقامگیریی سووریا و چڕکردنەوەی هەوڵەکان بۆ یارمەتیدانی ئەو وڵاتە بۆ دەربازبوون لە قەیرانەکان و کۆتایی هێنان بە ئازارەکانی گەلی سووریا کراوەتەوە.

سەبارەت بە تورکیاش، لە ڕەشنوسی بەیاننامەکەدا سەرکۆنەی دەستدرێژیی هێزەکانی تورکیا بۆ سەر خاکی عێراق کراوە و داوا لە حکوومەتی تورکیا کراوە بەبێ مەرج هێزەکانی بکشێنێتەوە.

سەبارەت بە بەرەنگاربونەوەی تیرۆر، لە ڕەشنووسەکەدا سەرکۆنەی هەموو جۆرەکانی ئۆپەراسیۆنی تاوانکاری کراوە کە لەلایەن ڕێکخراوە تیرۆریستییەکانەوە لە وڵاتانی عەرەبی و جیهان دەستیپێکردوە، داواش لە وڵاتانی عەرەبی کراوە کە پەیماننامەی عەرەبی بۆ بەرەنگاربوونەوەی تیرۆریان پەسەند نەکردوە، پەسەندی بکەن.