بەپێی هەواڵی کوردپرێس، پەروین بوڵدان هاوسەرۆکی گشتیی هەدەپە لە میانی بەشداری کردنی لە گردبوونەوەی جەماوەریی پارتەکەی لە باخی گەل لە مێرسین ئاماژەی بەوە کرد، لە هەڵبژاردنەکانی ١٤ی ئایاردا مێژوو دەنووسنەوە و بە شێوەیەکی بەهێز دەچنە نێو پەرلەمان.

بوڵدان بە ئامادەبووانی گردبوونەوە جەماوەرییەکەی ڕاگەیاند، ئەوان لایه‌نگری گۆڕانکارین و وتی: "ئەو نەریته‌ی لە هەدەپەوە وەرمان گرتووە، لە چەپی سەوزدا بەردەوامی پێدەدەین، چەپی سەوز، گەرەنتیی ئاشتی، برایەتی، ئاسوودەیی و خۆشگۆزەرانی ئەم وڵاتەیە".

هاوسەرۆکی گشتیی هەدەپە باسی لەوە کرد حکوومەت هیچ شتێکی نەماوە له ‌رێگه‌یه‌وه‌ بەڵێن به‌ خەڵک بدات و ڕەخنەی لە به‌ڕێوه‌ بردنی ئابووریی له‌لایه‌ن حکوومەته‌وه‌ گرت.

پەروین بوڵدان رایگه‌یاند: "بە دڵنیاییەوە بەهار بۆ ئەم وڵاتە دێت، لەگەڵ ئەو سەرکەوتنە گەورەیە، بردنەوەیە و دەستکەوتەی کە لە ١٤ی ئایار بە دەستی دەهێنین، لە پێناو ئەمەدا تەنانەت لەم سی رۆژەشدا زۆر ئیش دەکەین، چەپی سەوز دەخەینە هەموو ماڵێکەوە".

سەرچاوەی هەواڵ: تۆڕی میدیایی خەڵک