بەپێی هەواڵی کوردپرێس، وەزارەتی دەرەوەی تورکیا لە ڕاگەیەنراوێکدا ئاماژەی بەوە کردووە، ئاسمانی تورکیا، بەڕووی هەر فڕۆکەیەک، کە فڕۆکەخانەی نێودەوڵەتی سلێمانی بەکار دەهێنێت لە 3ی نیسانەوە، داخراوە.

وەزارەتی دەرەوەی تورکیا ڕوونیشی کردۆتەوە: "ئەم بڕیارە بەهۆی زیادبوونی چالاکییەکانی پەکەکە و هەژمونیی ئەو ڕێکخراوە لە فڕۆکەخانەکە دراوە چوونکە ئەو چالاکییانە مەترسیی لەسەر ئاسایشی فڕین دروست کردووە".

ئاماژەی بەوەش کردووە، ئەم بڕیارە سەرەتاییە و لانیکەم تا 3ی تەمموزی 2023 بەردەوام دەبێت، بەڵام لە دوای ئەو بەروارەوە لە چوارچێوەی گۆڕانکارییکەکان، بڕیاری دیکە دەردەکەن.

جەختیشی کردۆتەوە، جگە لە هێڵە ئاسمانییەکانی وڵاتی تورکیا، هیچ هێڵێکی دیکەی ئاسمانی وڵاتانی دیکەش بۆ گەشت کردن بۆ فڕۆکەخانەی سلێمانی، ناتوانن ئاسمانی تورکیا بەکار بهێنن.