کوردپرێس:

ڕۆژی سێشەمە 18ی سەرماوەزی 1399 فەیسەڵ مێقداد وەزیری دەرەوەی سووریا لەگەڵ حەسەن ڕۆحانی سەرۆککۆماری ئێران و محەمەد جەواد زەریف وەزیری دەرەوەی ئێران دیداری کرد و لە کۆبوونەوەکەدا جەخت کرایە سەر بەردەوام بوونی هاوکاریی هەردوو وڵات دژی دیاردەی تیرۆر و هەروەها هەڕەشە ئەمنییەکانی سەر خاکی سووریا.

نووسینگەی ڕاگەیاندنی سەرۆکایەتیی کۆماری ئێران لەبارەی دیدارەکەوە ڕایگەیاند لە دیدارەکەدا حەسەن ڕۆحانی جەختی کردە سەر کاری پێکەوەییی نێوان ئێران و سووریا بۆ بەرپەرچدانەوەی ئەو مەترسییانەی هەڕەشە لە بەرژەوەندییەکانی سووریا و ئێران دەکەن.

ڕۆحانی لە دیدارەکەدا بەبۆنەی کۆچی دواییی وەلید موعەلیم وەزیری پێشووی دەرەوەی سووریا پرسە و سەرەخۆشیی ئێرانی ڕاگەیاند و دووپاتی کردەوە بە هەموو شێوازێک ئامادەی بەردەوام بوونی هاوکارییەکان لەگەڵ سووریان.