بەپێی هەواڵی کوردپرێس، نووسینگەی راگەیاندنی جێگری سەرۆکی ئەنجومەنی نوێنەرانی عێراق بڵاوی کردەوە، بەشیر حەداد لەگەڵ قاسم ئەعرەجی راوێژکاری ئاسایشی نیشتمانی عێراق کۆ بووەتەوە و بارودۆخی ئەمنی و سەربازی و ھەوڵەکان بۆ ووبەڕوبونەوەی پاشماوەی تیرۆر لە ھەندێک ناوچەی وڵات و رێگری لە ڕوودانی تاوانی بەرنامە بۆ دارێژراو تاوتوێ کراون.

ئەوەش هاتووە، لە کۆبوونەوەکەدا گفتوگۆ لەبارەی چەندین بابەت کرا کە جێگەی بایەخی ھەردوولا بوون و باسیش لە گرنگی ھەوڵەکان کرا بۆ گرتنەبەری رێوشوێنی ئەمنی توندوتۆڵ بۆ دووبارە نەبوونەوەی ھەندێک ڕووداو کە بەم دواییانە لە ھەندێک ناوچە دەبینران.

جێگری سەرۆکی ئەنجومەنی نوێنەرانی عێراق ئەوەشی خستوەتەڕوو، بە گرنگی دەزانن بەردەوامی ھاوکاری سوپا و ھێزەکانی پێشمەرگە بوونی هەبێت بەمەبەستی جێگیرکردنی ئارامی و سەقامگیری لە ناوچه جێناکۆکەکان و چارەسەرکردنی کێشەی پارێزگاکان و جەختیش دەکەنەوە لە گرنگی پەرەپێدانی ھاوکاری و ھەماھەنگی نێوان ئەنجومەنی نوێنەران و دامودەزگا ئەمنی و سەربازییەکان بە مەبەستی جێگیرکردنی سەقامگیری لە چوارچێوەی یاسا بەرکارەکان.

کۆدی هەواڵنێر: 60113