فەرماندەی سنوورەوانیی ئێران: پشتگیریی کۆڵبەر دەکەین/ ڕژدین لە بەرپەرچدانەوەی قاچاخچی و خراپەکاران
پوختەی هەواڵ
کوردپرێس:
ڕۆژی سێشەمە 28ی گەلاوێژی 1399 ئەحمەد عەلی گوودەرزی فەرماندەی مەرزەبانیی هێزی ئینتزامیی ئێران سەردانی پارێزگای کرماشانی کرد و لە سەردانەکەیدا لەگەڵ مامۆستا عەبدولقادر قادری پێشنوێژی شاری پاوە دیداری کرد.
لە دیدارەکەدا فەرماندەی سنوورەوانیی ئێران باسی پشتگیری کردنی کۆڵبەرەکانی کرد و ڕایگەیاند: هێزەکانی سنوورەوانی دژایەتیی ئەو کۆڵبەرانە ناکەن کە بۆ دەستخستنی نانی خێزانەکانیان ڕوو دەکەنە کۆڵبەری.
گوودەرزی گوتیشی سیاسەتی هێزەکانی سنوورەوانی ئەوەیە کە بەرپەرچی قاچاخچێتی و خراپەکاری بداتەوە بۆیە دژایەتی کۆڵبەری نەکردووە و پشتگیریی کۆڵبەرەکانیش دەکات.
فەرماندەی سنوورەوانیی ئێران گوتیشی هاووڵاتییانی دانیشتووی سنوورەکان دەوری تایبەت لە ئاسایش و ئەمنی وڵاتدا دەگێڕن و بەو مەبەستەش هاریکاری و هەماهەنگیی باش لە نێوان ئەو هاووڵاتییانە و هێزەکانی پارێزەری سنوور دروست بووە.
لای خۆیەوە مامۆستا قادری جەختی کردە سەر زەروورەتی پارێزگاری کردن لە سنوورەکان و هەروەها بە پێویستی زانی کە هێزەکانی سنوورەوانی پشتگیریی ئەو کۆڵبەرانە بکەن کە بە شێوەی ڕێگەپێدراو و بۆ دەستخستنی بژێوی ژیانیان بۆ کۆڵبەری ڕوو دەکەنە سنوورەکان.
بۆچوونی بەکارهێنەران