کوردپرێس:

ئیدارەی بەنداوی تشرین لە هەواڵێکدا ڕایگەیاندووە تورکیا ڕێژەی ئاوی فوراتی کەم کردۆتەوە و لە مانگی ئاداری ئەمساڵەوە دەستی کردووە بە کەم کردنەوەی دێبیی ئەو ئاوەی ڕووباری فورات کە بەرەو باکوور و خۆرهەڵاتی سووریا دەڕوات. ئەوەش وای کردووە بەرهەمهێنانی کارەبا لە بەنداوی تشرین بە ڕێژەیێکی زۆر دابەزێت و جووتیارانی ناوچەکەش بۆ ئاوداشتنی زەویوزارەکانیان تووشی کێشە ببن.

بەگوێرەی نووسراوی ئاژانسی هەواڵی هاوارنیوز ئیدارەی بەنداوی تشرین ئەوەشی ئاشکرا کردووە کە لە بەر دابەزینی ئەو ئاوەی دەڕژێتە بەنداوەکەوە بەرهەمهێنانی کارەبا و دابەش کردنی کارەبا لە دوو سەنتەری فورات و تشرین لە باکوور و خۆرهەڵاتی سووریا لە سەرەتای ئەم هەفتەیەوە بە ڕێژەی 33 لە سەد دابەزینی بە خۆوە بینیوە. پێشتر بۆ ماوەی 18 کاتژمێر کارەبا لە سەنتەرەکە بەرهەم دەهێنرا و دابەش دەکرا بەڵام ئێستا ئەو ڕێژەیە بۆ 12 کاتژمێر دابەزیوە. لە بەر کەم کرانەوەی ڕێژەی ئەو ئاوەی دەڕژێتە بەنداوەکەوە بەرهەمهێنانی کارەبا دابەزینی بە خۆوە بینیوە و لە ڕۆژانی داهاتوودا کوژانەوەی کارەبا بۆ ماوەی زیاتر دەبینرێت.