بەپێی هەواڵی کوردپرێس، گۆڤاری ئەمریکی سۆفێرپ سەرەبە هێزە خانەنشین کراوەکانی ئەمریکا لە یادداشتێکدا باس لە هەوڵی کوردەکانی عێراق و سووریا دەکات بۆ دامەزراندنی کیانێکی سەرەبخۆ. ئەم گۆڤارە کە نووسەرەکانی سەربازە خانەنشین کراوەکانن دۆخی ئەو وڵاتانە لێکدەداتەوە کە ئەمریکا چالاکیی تێدا کردوون.

سۆفێرپ لە نووسینێکدا باسی بەڕێوەچوونی ڕیفراندۆمی سەربەخۆیی هەرێمی کوردستان لە ساڵی 2017 دەکات کە هەوڵی جیدیی کوردانی عێراق بووە بۆ گەیشتن بەسەربەخۆیی.

گۆڤارەکە دژایەتیی ئەمریکا بۆ بەڕێوەبردنی ڕیفراندۆم لە هەرێمی کوردستان دێنێتەوە بیر و بڕوای وایە کە بەشێکی زۆر لە دژایەتیی ئەمریکا لەگەڵ سەربەخۆیی هەرێمی کوردستان دەگەڕێتەوە بۆ پاراستنی پێوەندییەکان لەگەڵ تورکیا چوونکە تورکیا سەرسەختانە دژایەتیی سەربەخۆیی کوردانی عێراق دەکات و ئەگەر ئەمریکا پشتگیری لە سەربەخۆیی کوردەکانی عێراق بکات مومکینە کێشە لە پێوەندییەکانی ئەم دوو ئەندامەی ناتۆدا دروست ببێت.

بەگوێرەی شرۆڤەکەی ئەم گۆڤارە، بەشێکی زۆر لە سیاسەتوانانی ئەمریکی بەهۆی ترس لە تێکچوونی پێوەندییەکانی ئەنقەرە و واشنتن ئامادە نین پشتگیریی لە سەربەخۆیی کورد بکەن.

سۆفێرپ جەخت دەکاتەوە ئەمریکا بەهیچ شێوەیێک پشتگیری لەسەربەخۆیی کوردەکان ناکات و ئەگەر ئەمریکاش پشتگیریی لەم بابەتە نەکات شەرعیەتی نێودەوڵەتیی پێنادرێت.

ئەم گۆڤارە هەروەها دەنووسێت لەمپەڕێکی سەرەکیی دیکە بۆ گەیشتنی کوردەکانی عێراق بە سەربەخۆیی زۆر بوونی حزبەکان لە هەرێمی کوردستانە و ڕوانگەی جیاواز و دژبەیەکی زۆر لە هەرێمی کوردستان هەن لە نێو سیاسەتواناندا کە بوەتە هۆی پەرەسەندنی ناکۆکیە سیاسییەکان و چاوەڕوانیش ناکرێت کوردەکان بتوانن بگەن بە داخوازیێکی هاوبەش لەبارەی سەربەخۆییەوە.

کۆدی هەواڵنێر: 60113