کوردپرێس:

شێخ جەعفەر مستەفا، جێگری سەرۆکی هەرێمی کوردستان لە کۆنفڕانسێکی ڕۆژنامەوانیدا لە کوڵەجۆ ڕایگەیاند، لەم ناوچەیە بۆشایییێکی ئەمنی دروست بووە، کە نە هێزە کوردییەکان کۆنتڕۆڵی تەواویان هەیە و نە هێزە عیراقیییەکان.

جێگری سەرۆکی هەرێم ئاماژەى بە ئەوەش دا، پێشتر هێزەکانی پێشمەرگە لەم ناوچەیە بوو، و زۆر باش کۆنتڕۆڵ کرابوو، بەڵام پاش پاشەکشێی هێزەکانى پێشمەرگە، هێزەکانی عیراق هاتونەتە ناوچەکە و نەیانتوانیوە کۆنتڕۆڵی بکەن، بۆیە بۆشاییی ئەمنی دروست بووە.

ناوبراو باسی لە ئەوەش کرد، ئەو داعشانەى کە ئێستا دێنە ئەم ناوچەیە، لەپشتی هێزەکانی عیراقەوە دێنە ئێرە و دواتر دەگەڕێنەوە پشتی هێزەکانی عیراقەوە.

شێخ جەعفەر ئەوەشی خستە ڕوو، هەوڵ دراوە هەماهەنگی هەبێت و هێزی هاوبەش دروست بکەن بۆ ئەم ناوچەیە و بۆشاییە ئەمنییەکان نەهێڵن، بەڵام بەغدا ئامادەییی نییە.

ئاماژەى بەئەوەشدا، وەک کورد ئامادەی هەموو جۆرە ڕێکەوتنێکن بۆ پاراستنی ئەم ناوچانە و نەهێشتنی بۆشاییە ئەمنییەکان.

ئەمە لە کاتێکدایە لە چەند شەوی ڕابردوودا داعش هێرشی کردە سەر سەنگەرەکانی پێشمەرگە لە کوڵەجۆ، کە بەهۆیەوە دوو پێشمەرگە شەهیدبوون.

*لە تۆڕی میدیاییی خەڵک وەرگیراوە

کۆدی هەواڵنێر: 60101