کوردپرێس:

کامیار داهیم بەڕێوەبەری ئاژەڵپزیشکیی پارێزگای ئازەربایجانی ڕۆژئاوا لە لێدوانێکدا ئاماژەی بە بوومەلەرزەکەی شاری خوی کرد کە لەم هەفتەیەدا ڕووی دا و دەڵێت: 2100 سەر مەڕوماڵاتی هاووڵاتییانی گوندنشین بوون بە ژێر ماڵ و گەوڕە ڕماوەکانەوە و فەرمانبەرانی ئیدارەی ئاژەڵپزیشکی سەرقاڵن بە دەرهێنانی لاشەی مەڕوماڵاتەکە بۆ ئەوەی بە شێوەیێکی تەندروستییانە کاری ناشتنیان بۆ بکرێت و شوێنەکە سەمپاشی و خاوێن بکرێتەوە.

ناوبراو گوتیشی فەرمانبەرانی دایرەی ئاژەڵپزیشکی تا ئەم کاتە تەنها لاشەی 65 سەر مەڕوماڵاتیان لە ژێر بینا داڕماوەکان دەرهێناوە.

بوومەلەرزەکەی پارێزگای ئازەربایجانی خۆرئاوا زیانی قورسی بەدوای خۆیدا هێنا و بەتایبەتی لە ناوچە کوردنشینەکانی دەوروبەری کوتول زیانەکان قورس بوون.

بە وتەی دانیشتووانی گوندەکانی دەوروبەری کوتول لە گوندی "کوتان ئاوا" 1200 سەر و لە گوندی "گیرناویک"یش 900 سەر مەڕوماڵاتی گوندنشینان بوون بە ژێر بینا داڕماوەکانەوە.