بەپێی هەواڵی کوردپرێس، عەبدولکەریم عومەر بەرپرسی پەییوەندییەکانی دەرەوەی بەڕێوەبەرایەتیی خۆسەری کوردی لە باکووری سووریا کە سەردانی فینلاندی کردووە، دوای کۆبوونەوە لەگەڵ پکا هاویستۆن وەزیری دەرەوەی ئەو وڵاتە ڕایگەیاند: کوردانی سووریا سەرقاڵی دامەزراندنی دادگایێکی خۆجێیین بەمەبەستی بەدواداچوون بۆ دۆسیەی ئەسیرە داعشەکان.

عەبدولکەریم عومەر، بەرپرسی پەییوەندییەکانی دەرەوەی بەڕێوەبەرایەتیی خۆسەر بە ڕۆیتێرزی وتووە 10000 داعش لە ماوەی ئەم چەند ساڵەدا لەلایەن هێزە کوردەکانی سووریاوە دەستگیر کراون کە یەک لەسەر پەنجی ئەو داعشانە لە وڵاتانی ئەورووپییەوە هاتوون.

زۆرینەی وڵاتە ئەورووپییەکان وەڵامی داخوازیی کوردەکانیان بۆ وەرگرتنەوەی داعشەکان نەداوەتەوە، بەڵام هەندێک لەو وڵاتانە ئامادەبوونە ژن و منداڵە داعشەکان وەربگرنەوە.

ناوبراو ئاماژەی بە پێشوازی نەکردنی ئەنجومەنی ئاسایشی نێونەتەوەیی دا لەباەری دامەزراندنی دادگایێکی نێودەوڵەتی بۆ دادگایی کردنی ئەو داعشانە و وتی ئەم پرسە چیدی وەلانراوە.

بەرپرسی پەییوەندییەکانی دەرەوەی بەڕێوەبەرایەتیی خۆسەر ڕاشیگەیاند ساڵی پێشوو کوردەکان پێشنیاری دادگایێکی خۆجێییان بۆ ئەوپرسە داوە کە بڕیارە لەماوەی 3 مانگدا جێبەجێ بکرێت.

عەبدولکەریم عومەر دەڵێت هۆکاری مکووڕ بوونی بەڕێوەبرایەتیی خۆسەر لەسەر ئەم بابەتە ئەمەیە کە داعش لە ناوچەکەیاندا تاوانی جەنگیی ئەنجام داوە و هەموو بەڵگەکانیش هەر لەوێن.

کۆدی هەواڵنێر: 60113