بەپێی هەواڵی کوردپرێس، له ‌حه‌وته‌مین دیدارى سلێمانى له ‌زانکۆى ئه‌مریکى، محه‌مه‌د شیاع سوودانى سه‌رۆک وه‌زیران له‌سه‌ر چه‌ند پرسێک هه‌ڵوه‌سته‌ى کرد و سه‌ره‌تا ڕایگه‌یاند: "ئێمە ئێستا لەسەروبەندی یادێکی کارەساتبارداین کە یادی کیمیابارانی ھەڵەبجەیە، دیاری ئێمە بۆ ھەڵەبجەییەکان بڕیاری بە پارێزگابوونی بوو کە دوو ڕۆژ لەمەوپێش بڕیارەکەمان دا".

په‌یامێکیشى ئاراسته‌ى سه‌رکرده ‌و حزبه‌کانى هه‌رێمى کوردستان کرد و ڕایگه‌یاند، "دەبێت ھەرێمی کوردستان بەھێز بێت بۆ ئەوه‌ى عێراق بەھێز بێت ‌و عێراقیش بەھێزبێت ھەرێم بەھێز دەبێت".

ناوبراو ئه‌وه‌شى وت: "په‌یامیشمان بۆ لایه‌نه‌ سیاسییه‌کان ‌و سه‌رکرده‌کانى هه‌رێمى کوردستان ئه‌وه‌یه‌ یه‌کڕیزبن ‌و ناکۆکیه‌کان وه‌لا بنێن".

سه‌باره‌ت به ‌هه‌ڕه‌شه‌ى وشک کردنى ڕووبارى سه‌رچاوه‌ ئاویه‌کان له‌لایه‌ن وڵاتانی دراوسێوە سوودانى وتى: "هیوادارین ڕێز له ‌دراوسێیه‌تى بگیرێت‌ و هیچ بیانوویه‌ک نه‌هێندرێته‌وه‌، چوونکه‌ هه‌رگیز ڕێگه‌ناده‌ین خاکى عێراق دژى وڵاتانى دراوسێمان به‌کاربهێندرێت‌ و چاوه‌ڕوانیشمان ئه‌وه‌یه‌ سه‌روه‌رى ئێمه‌ش له‌لایه‌ن وڵاتانى دراوسێوه‌ پارێزراوبێت".

سەرۆک وەزیرانی عێراق لە کۆتاییدا په‌یامێکی ناڕاسته‌وخۆشى ئاراسته‌ى حزبه‌کانى ئۆپۆزیسیۆنی ئێران و تورکیا کرد و ڕایگه‌یاند: "ڕێگە نادەین خاکی عێراق ببێتە مایەی ھەڕەشە بۆ وڵاتانی دراوسێمان".