ڕزوان سیدۆ ئەندامێکی مەکتەبی ڕێکخستنی ئەنجومەنی نیشتمانیی کورد (ENKS) لە گفتوگۆ لەگەڵ کوردپرێسدا ئاماژەی دا بە دوورنواڕی پرسی گفتوگۆی نێوان ئەنەکەسە و حزبەکانی یەکێتیی نیشتمانیی کورد و ڕایگەیاند: ماوەیێک پێش ئێستا ئەنجومەنی نیشتمانیی کورد کۆبوونەوەیێکی لەگەڵ نوێنەری ئەمریکا لە دانوستانەکاندا ئەنجام دا و ڕایگەیاند کە ئامادەن بۆ درێژەدان بە دانوستانی نێوان لایەنە کوردییەکانی سووریا.

ناوبراو درێژەی دا ئێمە بە ئەمریکییەکانمان گوت کە ئیدارەی خۆسەر و پارتی دەسەڵاتدار (PYD) بەردەوامن لەسەر هەڵمەتەکانی ڕابردوویان لەوان دەستگیر کردنی لایەنگرانی ئەنەکەسە، سووتاندنی نووسینگەکانی ئەنجومەنەکە و دۆخی دژواری گوزەرانی خەڵک و گرانی و نەبوونی یاسا.

ناوبراو زیادی کرد پاش کۆبوونەوەکە، نوێنەرەکەی ئەمیکا دانیشتنێکی لەگەڵ مەزڵووم کۆبانی فەرماندەی هێزەکانی سووریای دیموکرات ئەنجام دا و ئەنەکەسە پێیانی ڕاگەیاند کە ئامادەین بۆ درێژەدان بە دانووستان بە مەرجی ئازاد کردنی زیندانیەکان و واز هێنان لە ستەم لە کوردستانی سووریا و هەوڵ دان بۆ دابین کردنی بژیوی ژیانی خەڵک.

ناوبراو ئاشکرای کرد، سیاسەتی ئەنجومەنی نیشتمانیی کورد ڕوونە و ئێمە هەمیشە ئامادەی گفتوگۆ کردنین بەڵام لایەنی بەرامبەر هەموو جارێک لەمپەڕێکی نوێ دەنێتەوە.

ناوبراو زیاتر وتی پەیەدە هەموو جارێک ڕێگری دەکات لە بە ئەنجام گەیشتنی دانوستانەکان.